Təmsilçimiz qrup mərhələsində “Saburtalo”ya uduzub (0:1), “Kolxeti-1913”ə qalib gəlib (2:1). 1/4 finalda Gürcüstanın “TS Academy” komandasına qolsuz bitən matçın penalti seriyasında 5:4 hesabıyla qalib gəlib “Sabah” yarımfinalda “Torpedo”nu (0:1) məğlub edərək finala vəsiqə qazanıb. “Footbal-plus.az” olaraq, turnirdə keçirilən oyunlarla bağlı Arslan Quliyevin təəssüratını öyrəndik:
“Tbilisi Cup” turnirində 12 komanda iştirak etməliydi. Bəzi səbəblərdən 9 komanda oldu. Qazaxıstandan bəzi komandalar gələ bilmədi. Üç qrupun hər birində üç komanda var idi. 1/4 finalda “TS Academy” ilə qarşılaşma həddən artıq gərgin keçdi. Əsas vaxt heç-heçə bitdi. Penalti seriyasında 5:4 hesabıyla qalib gəldik. Gürcüstan komandalarında istedadlı uşaqlar var. Fərdi və komanda şəklində oynamağı bacarırlar. Çox güclü rəqiblərə qarşı oynayırıq. Bu gün yarımfinalda “Torpedo”ilə qarşılaşdıq. Oyun həddən artıq gərgin keçdi və 1:0 qalib gəldik. Uşaqlar əlindən gələni artıqlamasıyla etdi. Amma onu deyə bilərəm ki, çox yoruldular və çox əziyyət çəkdilər. Sabah (bu gün – red.) da final oynumuzu keçirəcəyik. Bizim uşaqların belə turnirdə iştirakı çox gözəldi. Rəhbərlik sağ olsun ki, bizə bu şəraiti yaradıb. Güclü rəqiblərə qarşı oynamaq çox böyük təcrübədi”.
ƏSƏD SEYİDOV
