PSJ – Real Sosyedad 2:0 (0:0)
PSJ (Paris, Fransa): Donnarumma, Hakimi, Markinyos, Pereyra (Ernandes, 72), Beraldo, Zair-Emeri, Ruis, Vitinya, Dembele (Kolo Muani, 83), Barkola (Asensio, 72), Mbappe.
Real Sosyedad (San-Sebastyan, İspaniya): Remiro, Traore, Subeldiya, Le Norman (Paçeko, 78), Qalan (Aramburu, 88), Subimendi, Merino, Mendes (Turrientes, 78), Kubo, Barreneçea (Zaxaryan, 66), Andre Silva (Sadiq, 78).
Qollar: Mbappe, 58 (1:0). Barkola, 70 (2:0).
Vərəqə: Le Norman, 36. Traore, 90+2 – sarı.
Hakim: Marko Quida (İtaliya).
14 fevral. Paris. 46435 tamaşaçı.

"Football-plus.az" xəbər verir ki, əslində bu oyun “Real Sosyedad” üçün heç də yaxşı dönəmə təsadüf etmədi. Püşk atılan zaman Alquasilin kollektivi yaxşı formada idi və həmin vaxt belə təəssürat oyanmışdı ki, “Sosyedad” güclü rəqibə layiqincə müqavimət göstərməyi bacaracaq. Amma yanvarın sonlarından başlayaraq “Real Sosyedad” qələbə qazanmamaq bir yana, heç qol da vura bilmir. Konkret bu görüşdə Mbappe artıq 5-ci dəqiqədə hesabı aça bilərdi. Amma yaxşı zərbə mövqeyinə çıxan fransalı superulduzun qarşısını qapıçı kəsdi. Hərçənd belə hərəkətli başlanğıcın davamı gəlmədi. “Real Sosyedad” ilk yarıda çox yaxşı müdafiə olunurdu və üstəlik hücumda da şanslar yaxalayırdı. Məsələn, fasilə ərəfəsində Merinonun qüvvətli zərbəsindən sonra parisliləri tir xilas etdi. İkinci hissənin əvvəllərində də oyunun axarı dəyişmədi. “Real Sosyedad” rəqibə şans verməyərək müdafiədə soyuqqanlı təsir bağışlayırdı. Oyunun qırılma anı 58-ci dəqiqəyə təsadüf etdi. Sağ cinahdan qazanılan künc zərbəsi zaman Dembelenin asmasından sonra Markinyos başla topu arxa dirəyə tərəf atdı. Orda isə qəribə şəkildə müdafiəçilərin gözdən buraxdığı Mbappe yaxın məsafədən topu tora göndərdi! Əslində Mbappenin boş qalmasının əsas səbəbi qonaqların sağ müdafiəçisi Traorenin həmin anda meydanda olmaması idi. Belə ki, künc zərbəsindən öncə zədə alan və həkimlərin müdaxiləsindən sonra qaydalara uyğun olaraq meydandan kənara çıxmaq məcburiyyətində qalan 32 yaşlı futbolçu oyuna vaxtında daxil ola bilmədi. Yəni PSJ künc zərbəsi vurarkən qonaqlar meydanda azlıqdaydılar və məhz Traorenin cavabdehlik daşıdığı Mbappe həlledici qolu vurdu. Bu qoldan ruhlanan Paris nəhəngi daha inamlı oynamağa başladı. Bir neçə dəqiqə sonra Mbappe dubl etməyə yaxın olsa da, mükəmməl zərbəsi tirə tuş gəldi. Amma ikinci hissənin ortalarında fərqi artırmaq mümkün oldu. Bu dəfə Barkola əla keçidini dəqiq zərbə ilə tamamladı. Qalan müddətdə PSJ-nin bütün cəhdlərinə baxmayaraq, fərqi darmadağın həddinə çatdırmaq mümkün olmadı. Beləliklə, qrup mərhələsinin ən az qol buraxan komandası “Real Sosyedad” Mbappenin qarşısını kəsə bilmədi. Amma indidən komandanın üstündən xətt çəkmək çox tezdi. Hər halda, ÇL tarixində ilk oyunda 2 top fərqi ilə uduzduqdan sonra mərhələni adlayan çoxlu komanda olub.

Faktlar
* Mbappe ÇL-də 68-ci oyunda 44-cü qolunu vurdu. 25 yaşlı futbolçu indidən bu turnirin ən məhsuldar futbolçuları siyahısında Neymar və Alessaandro Del Pyero kimi ulduzları geridə qoydusa, Didye Droqbanı yaxalamağı bacardı. ÇL tarixində yalnız bir futbolçu – Lionel Messi bu yaşda Mbappedən daha çox qol vurmuşdu. 26 yaşı tamam olmadan Messinin hesabında 59 qol var idi.
* Mbappe ÇL-də start heyətində meydana çıxdığı ardıcıl 10-cu ev oyununda qol vurmaqla turnirin yeni rekordunu müəyyənləşdirdi!
* “Real Sosyedad” XXI əsrdə avrokubokların pley-offunda keçirdiyi 11-ci qarşılaşmada da qələbəyə həsrət qaldı (4 heç-heçə, 7 məğlubiyyət)!
* “Real Sosyedad” ardıcıl 5-ci rəsmi oyunda qola həsrət qalmaqla şəxsi antirekordunu təkrarladı. San-sebastyanlılar daha öncə yalnız bir dəfə - 1973-cü ilin fevral-martında ardıcıl 5 rəsmi oyunda qol vura bilməmişdi. Hazırda komandanın “qol orucu” rəsmi matçlarda 474, ÇL-də isə 339 dəqiqəyə bərabərdi.

oyunun statistikası
14 (6) qapıya (“çərçivə”yə) zərbə 8 (0)
9 künc zərbəsi 7
3 ofsayd 2
6 qayda pozuntusu 15
0 (0) sarı (qırmızı) vərəqə 2 (0)
58 topa sahibolma (faizlə) 42

Oyundan sonra...
Luis Enrike, PSJ-nin baş məşqçisi: “ÇL-də İspaniya təmsilçisi ilə üz-üzə gəlmək çoxdankı arzum idi. Amma oyun heç də rahat keçmədi. “Real Sosyedad” elə-belə rəqib olmadığını göstərdi və bizə ciddi problemlər yaratdı. Belə futbola görə onları təbrik edirəm. Meydanın hər qarışı uğrunda inanılmaz mübarizə aparırdılar. Parisə gəlib bu cür futbolçulara qarşı belə oynamaq hər komandanın işi deyil. Pressinqdən istədiyimiz kimi istifadə etməyə imkan vermədilər. Düzünü desəm, “Sosyedad” ən azı meydanı qolsuz tərk etməyə layiq deyildi. Fasilədə mənə kimsə bu gün 2 cavabsız qolla qalib gələcəyimizi desəydi, həmin an sevincdən rəqs etməyə başlayardım. İkinci hissəni daha inamlı keçirdik. Fasilədən sonra tempi artırdıq. Pressinqdən də fayda görməyə başladıq. Rəqib isə əksinə, bir qədər zəif oynadı. Hücum oyunçularımın performansından razı qaldım. Amma indidən mərhələni keçdiyimizi qətiyyən düşünməməliyik. Cavab oyununa hələ çox var. Vaxtı gələndə o matça hazırlaşacağıq”.
İmanol Alquasil, “Real Sosyedad”ın baş məşqçisi: “İkinci hissə istədiyimiz kimi keçmədi. İlk buraxdığımız qol matçın axarına təsir etdi. O ana qədər meydanda bərabər səviyyəli mübarizə izləyirdik. Belə qol buraxmaq bizə yaraşmadı. Traore həlledici məqamda meydanda olmadı! Bundan sonra PSJ daha inamlı və bizdən yaxşı oynamağa başladı. Ümumi götürəndə sərgilədyimiz futboldan razı qaldım. Nəzərə alaq ki, fasilədən sonra ikidən artıq top buraxa bilərdik. Arzularla yaşamaqda davam edəcəyik. Cavab matçında bugünkü oyunun ilk yarısındakı futbolumuzu sərgiləyə bilsək, mütləq şanslarımız olacaq. Yalnız bu halda PSJ-nin işini çətinləşdirə bilərik”.
Cavab görüşləri martın 5-də keçiriləcək.