“Braqa” üçün son vaxtlar heç nə yolunda getmirdi. Çempionat və kubok oyunlarında yaşanan uğursuzluğu tənqid etməkdən doymamışdıq ki, komandanın Avropa Liqası macərası təhlükəylə üz-üzə qaldı. Kabusun adı “Qarabağ”dı. Baş məşqçisi yerli Qurban Qurbanov olan komanda “silah ustaları”nın bütün zəif cəhətlərini ortaya qoydu. Sən demə, onların çox az “patron”u qalıbmış... “Qarabağ” Azərbaycanın ən güclü komandası olsa da, Artur Jorjenin uğursuzluqlarını örtmək üçün ideal rəqib idi. Çünki bu rəqibin müdafiə xətti çox kövrəkdi. Qurban Qurbanov oyunçularını hücum futboluna o qədər öyrəşdirib ki, arxa xətdə qalmalı olan oyunçular belə rəqibin qapısı tərəfə can atırdı. Kollektiv sadə, yetkin və praktiki sistemə malikdi. İlk dəqiqələrdə rəqibin oyun xatirinə meydanda olduğunu düşünürdüm. Yox, belə deyilmiş. Onlar rəqibi kəşf etməyə çalışırmış. Və çox qısa zamanda Jorjenin “silahlarını atəş aça bilməyəcək” duruma gətirdilər. “Braqa”nın baş məşqçisi də onlara xeyli kömək etdi. İşlək mexanizmi 4-4-2-yə dəyişərək rəqibin 15 dəqiqə ərzində 3 qol vurmasına səbəb oldu. İndi Jorje qalstukunu taxmalı, üzünü təmizləməli və Bakıya minimum 3:0 hesablı qələbə üçün yollanmalıdı. Yoxsa Əl-Musratinin gedişiylə yetim qalan “Braqa” adi komandalardan birinə çevriləcək...”