“Sadəcə, üçünü saxlayıb birini dəyişsək, bu vizual baxımdan yaxşı görünməyəcək”
Xatırlayırsızsa, Misli premyer-liqasının 18-ci turunun “Turan Tovuz” – “Araz–Naxçıvan” oyunu 81-ci dəqiqədə dayandırılmışdı.
Buna səbəb stadionun işıq dirəklərindən birinin külək üzündən qazona aşması idi. Nəticədə matç ertəsi davam etmişdi. Bir neçə gün əvvəl klubun idarə heyətinin sədr müavini, infrastruktur və maliyyə üzrə direktoru Əli Babakişiyev “Futbol+”ə mövzuyla bağlı açıqlamasında bunları demişdi:
“Bakıda yeni, heç istifadə olunmamış dörd dirək tapmışıq. Onların alınmasıyla bağlı, demək olar ki, razılıq əldə olunub. Dirəklər hələ ki Tovuza aparılmayıb. Çünki stadionda o biri dirəklərin demontajına başlanılıb. Üç dirək hələ ki yerindədi. Hazırda dirəklərin üstündəki projektorlar sökülür”.
Tovuza şəxsi xarakterli səfəri fürsət bilib stadionda Əli bəylə görüşdüm və bəzi suallara cavab tapmaq istədim. Yəni Bakıdakı dirəklər stadiona çatdırılıbmı, bu dirəklərin daha möhkəm olması üçün əvvəlkindən fərqli hansı addımlar atılacaq, 4 projektorun gücü stadionu lazımi səviyyədə işıqlandırmağa bəs edəcəkmi, projektorlar quraşdırılandan dərhal sonra “Kəpəz” Qəbələdən Tovuza köç edəcəkmi? Balakişiyev suallara belə cavab verdi:
“Stadionda dirəyin aşması 100 ildə bir dəfə baş verən hadisədi. Yaşca böyük olan insanlarda deyir ki, biz Tovuzda belə külək görməmişik. Şəhərin özündə də xeyli dam uçdu. Stadionda isə belə hadisə baş verdi. Əslində gətirdiyimiz dirəklər bundan təzədi, ümumiyyətlə, işlənməyib. Köhnə dirəkləri çıxarıb gələcəkdə başqa yerlərdə işlədəcəyik. Dörd dirəyi dəyişmək o demək deyil ki, köhnə dirəklər keyfiyyətsizdi. Sadəcə, üçünü saxlayıb birini dəyişsək, bu vizual baxımdan yaxşı görünməyəcək. Ona görə də qərara aldıq ki, dəyişiriksə, hamısı dəyişsin. Projektorlar stadionu lazımi səviyyədə işıqlandırır. Əlavə projektor quraşdırmağa ehtiyac yoxdu. Köhnə dirəklər gələcəkdə stadionlarımızın birində mütləq istifadə olunacaq. Bakıdan yeni briqada və texnika gələcək. “Kəpəz”in taleyinə gəlincə... Təbii ki, bu komanda ilə eyni bölgədənik. Amma birinci işıqlandırmanı düzəltmək lazımdı ki, sonrasını düşünək”.
Tovuz stadionunun ərazisində tikilən yeni akademiya binasında işin dayandığını da xəbər vermişdik. Daha doğrusu, Fövqəladə Hallar Nazirliyi sənəd çatışmazlığına görə klubdan inşa prosesini dayandırmağı tələb etmişdi. Bəs sənəd problem həll olundumu? Əli bəy bu suala da cavab verdi:
“İcra hakimiyyətinə aid olan bəzi sənədlər var idi. İcra başçısı çox sağ olsun ki, sənədləri tez bir zamanda düzəldib verdilər. Sadəcə, FHN-ə bu sənədi təqdim etmək qalıb. Bizdən istədikləri sənədlər artıq yığılıb və hazırdı. Yəqin ki, tez bir zamanda icazə verərlər, işimizi davam etdirərik”.
ƏSƏD SEYİDOV
Digər xəbərlər
