“İşıqlar, kabellər və transformatorlar istifadəyə yararlıdı”
Tovuz şəhər stadionunda yaşanan xoşagəlməz hadisədən xəbərdarsız.
Xatırladaq ki, Misli premyer-liqasının 18-ci turunun dekabrın 23-də keçirilən “Turan Tovuz” – “Araz-Naxçıvan” matçında projektor dirəyi meydançaya aşmışdı. Xoşbəxtlikdən xəsarət alan olmamış, oyunun qalan 9 dəqiqəsi dekabrın 24-də keçirilmiş və ev sahibləri 3:1 hesablı qələbəyə sevinmişdi.
Hadisədən dərhal sonra “Futbol+” olaraq, “Turan Tovuz”un İdman və Əməliyyatlar üzrə direktoru Səməd Nəsibovla əlaqə saxlamışdıq. O, qəzetimizə açıqlamasında problemin aradan qaldırıması üçün təcrübəli mütəxəssislərin prosesə cəlb edildiyini demişdi. Əlavə etmişdi ki, ekspertiza rəyindən sonra ehtimallar dəyərləndiriləcək və nəticəyə uyğun addım atılacaq.
Məsələnin üzərindən artıq 4 gün keçdiyini nəzərə alaraq, Səməd bəyi yenidən aradıq. Klub rəsmisi problemlərin həlli istiqamətində atılacaq addımlara sabah qərar veriləcəyini dedi:
“Dirəklərin hamısının dəyişdirilib-dəyişdirilməyəcəyi bəlli deyil. Sabah keçiriləcək toplantıda proses təhlil ediləcək və bu haqda yekun qərar veriləcək”.
Bəs, klub hadisəyə görə nə qədər ziyana düşüb? Direktor bunu bizimlə paylaşmaq istəmədi:
“Açıqlaya bilmərik, lakin böyük məbləğdi. Təsəlli aldığımız məqam isə insan sağlamlığının zərər çəkməməsidi. Növbəti məsələ, ola bilsin, təkcə dirəklərin dəyişdirilməsi olacaq. Yəni işıqlar, kabellər və transformatorlar istifadəyə yararlıdı”.
Görəsən, hadisəylə bağlı məsul şirkətin adı nədi? Ekspertiza rəyi açıqlanıbsa, problem konkret nədən qaynaqlanır? Səməd bəyi dinləyək:
“Şirkət adı çəkməyimiz də mümkün deyil. Təcrübəli mütəxəssislərin prosesə cəlb edildiyini demişdik. Yekun olmasa da, ilkin nəticələrə görə dirəyin bərkidildiyi betonda, qalın boltlarla möhkəmləndirilməsində hansısa çatışmazlıqdan söhbət getmir. Məhz dirəyin sağlamlığında qüsurlar ola bilər. Bu ehtimalın doğru olub-olmadığına isə yaxın günlərdə aydınlıq gələcək”.
KƏNAN BAHADIR
Digər xəbərlər
