“Demək olar ki, yüksək dərəcədə nəzərə çarpan bir transfer olmadı. Təkcə “Neftçi”nin oyunçusu Brayan Moreno ola bilər ki, o da əvvəlki oyununu göstərsə. Doğrudu, qol vurur, ancaq hələ istəniləni vermir. Ötənilki formasına qayıtsa, kömək edə biləcək. Alfa Konte də elə Melanonun, Olenarenin cərgəsinə qoşulacaq futbolçudu. Bir sözlə, bu yöndə “Neftçi” “liderdi”. Elə komandalar oldu ki, müxtəlif səbəblərdən heç bir futbolçu transfer etmədi. Ən çox transfer edən klub “Səbail”di. Üç transfer reallaşdırdı, amma dünən (srağagün – red.) 3 qol buraxdı. Son on oyunda 3 qol vura bilməyən “Zirə” “Səbail”ə bir oyunda 3 qol vurdu. Yəni “dənizçilər”də qeyri-adi futbolçu yoxdu. Məsələn, Ayub Masika nə vaxsta yaxşı oynayıb, amma indi onu görmürük. Həm də oyunçular nə etsinlər ki, onların məşqçiləri Şahin Diniyevdi. Bəlkə oynaya bilirlər? Məncə, ASCO rəhbərliyi araşdırsa Şahin Diniyevin fəaliyyətini ki, o transferlər hansı yolla, necə edilib, nə pullar buraxılıb o oyunçulara, əvəzində hansı keyfiyyətdə futbolçular komandaya gəlib... “Səbail” indi turnir cədvəlində 7-ci yerdədi, bu gün–sabah isə 8-ci yerdə olarlar. Bir sözlə, bu məsələlər hansısa işlər naminə transfer etməklə deyil. Necə ki, hazırda bunu “Kəpəz” göstərir”.

“Əslində daha çox transfer gözləyirdim. Sadəcə, əcnəbi oyunçulara görə təyin edilən limit və ona uyğun artan rüsum bir çox klubun transferlərinə məhdudiyyət yaratdı. Oyunçuları premyer-liqanın ötən 3 turu və kubok oyunları ərzində izləmək şansım oldu. Qış transfer dönəmi uyğunlaşma baxımından çətin dövrdü. Sanki, kəşfiyyat etmədən birbaşa döyüşə atılırsan. Maraqlı oyunçulardı. Hələ ki Aleks Souzanın oyun üslubu daha çox xoşuma gəlir. Həmçinin “Səbail”dəki Süleyman Alluşun texnikası göz oxşayır. Ümumiyyətlə, yeni oyunçular “Səbail”in hücum xəttinə sürət və canlanma gətirib. Digər klubların da azad agent statuslu milli komanda üzvlərini, xüsusən də Asiya və Afrikanın yığma səviyyəli turnirlərində çıxış etmiş komandalardan transfer edəcəklərinə inanıram”.