"Açığı, mən ilk 5 tura görə çempionatın səviyyəsi və klubların transfer siyasəti barədə təhlil aparmağı düzgün hesab etmirəm. Çünki premyer-liqa hələ yenicə start götürüb, elə komandalar var hələ formalaşmayıb, eləsi var formalaşmaqdadı. Ümumi götürəndə heç bir komanda 100 faiz formalaşmayıb. Elə zəif səiviyyəli oyunçu olar ki, gəlib çempionatımızda parlayar. Eləcə də yüksək səviyyəli legioner oyunçu olar ki, premyer-liqamızda batar. Odu ki, indidən qiymət vermək doğru deyil. "Turan Tovuz"un səfərdə "Sabah"ı darmadağın etməsi, "Səbail"in son çempiona qalib gəlməsi hələ qaliblərin güclü olması və məğlubların zəifliyi anlamına gəlməməlidi. Qısası, ilk 5 turda sensasiyaların qeydə alınması hələ çempionatımızın səviyyəsinin yüksəlməsi və transferlərin uğurlu olması demək deyil. Mənə görə inkişaf qitəmiqyaslı yarışlardakı çıxışla ölçülməlidi. Baxın, dörd komandadan yalnız "Qarabağ" imicini qorumaqla avrokubokda yoluna davam edir. Premyer-liqanın vitse-çempionu Konfrans Liqasında nə qədər uğurlu çıxış etsə də, sonda göründü ki, birdən artıq mərhələ keçmək iqtidarında deyil. Eləcə də ilkin qiymətləndirməni ən yaxşı halda qış fasiləsində söyləmək olar. Hərçənd bu da tam deyil. Belə təhlilə ara qiymətləndirməsi deyilir. Sözüm budu ki, obyektiv təhlil üçün hələ zamana ehtiyac var". 

"Ümumi götürəndə çempionatımızın güclənib-güclənmədiyini demək tezdi. Bunu yalnız gələn yay klublarımızın avrokuboklarda çıxışı zamanı söyləmək olar. Amma premyer-liqamızda canlanma var. Ən azı ötən mövsümlə müqayisədə aşkar autsayder olmayacaq. Transferlərə gəlincə, "Zirə" başqalarıyla müqayisədə daha çox güclənib. "Sabah" aparıcı oyunçularını itirsə də, onların yerlərinə gələnlər zamanla boşluğu dolduracaq. Çünki komandanın oturuşmuş modeli var. Ən azı ötən mövsümdəki səviyyədə "Sabah" görəcəyik. Hələ ki "Neftçi"yə cəlb olunan legionerlər ümidi doğrultmur. Əsasən da hücum xəttində. "Qarabağ" hazırda iki cəbhədə döyüşür. Çempion özünü 2-ci dövrədə daha yaxşı göstərəcək. Oyun və heyət sarıdan "Qəbələ" zəif görünsə də, ötənilki "Şamaxı"dan 4-5 dəfə güclü olduğu qənaətindəyəm. "Turan Tovuz" futbolçu yığımı baxımından yaxşı təsir bağışlayır. Digər komandalarda da müəyyən inkişaf var. Hər biri maksimum yuxarı yerlərə qalxmaq üçün çarpışır. Yuxarıda da dediyim kimi, əsas inkişaf odu ki, heç kim qapazaltı olmaq istəmir".