Misli premyer-liqasının 22-ci turunda “Qarabağ” “Sabah”ı qəbul edib - 3:3.

“Football-plus.az” xəbər verir ki, oyundan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi onun fikirləri ilə tanış edirik:

- Andrey Lunyov uzaqdan zərbələr zamanı topları götürə bilmir. Bu sizi narahat edir?
- Fikir bildirə bilməyəcəm. Baxımlı qollar idi. Hətta rəqibin üçüncü qolunu özüm alqışladım. Baxımlı qol oldu. Videotəkrara baxmaq lazımdı. Buna daha çox qapıçılar üzrə məşqçi baxacaq. Bəlkə düzgün mövqedə deyildi. Amma Lunyov təcrübəli qapıçıdı. Bəzən görürsən ki, belə qollar olmayanda, düşünmə qabiliyyəti azalır. Belə qollar olanda, qarşıdakı epizodlara daha ciddi hazırlaşırsan.

- Komandanızda hansı çatışmazlıqları gördüz?
- Çatışmazlıqlar var. İdeal formada deyilik. Bu qədər qol buraxırıqsa, demək ki, çatışmazlıqlar var. Rəqibin yaxşı düşünülmüş hücumları var idi. Komanda diqqətli oynayırdı. Burda tək müdafiə xəttini günahlandırmaq istəmirəm. Komanda şəklində bəzi çatışmazlıqlar oldu. Hücumda oynayırsansa, istər-istəməz boşluqlar buraxmaq normaldı. Bizim qapımıza bu qədər penalti təyin edilməsini xatırlamıram. Uduzsaq da, daha çox topa sahib olmaq istədik. Yaxşı qol epizodları var idi. Buraxılan qollardan hamılıqla fayda çıxaracağıq.

- Mərkəz müdafiəçisinin yeri görünür?
- Bəhlul və Bədavidən razıyam. Kevin Medina sağlam olsaydı, daha yaxşı idi. Mərkəz müdafiə xətti elədir ki, orada yanılmalı deyilik. Daha diqqətli və dəqiq iş aparılmalıdı. Əlimizdəki futbolçulardan razıyam. Yaxınlarda da Allah qoysa, Kevin geri dönər.

- Bu cür oyundan sonra "Braqa" matçına motivasiya olmaq çətin deyilki?
- O oyunlar tam fərqlidi. Motivasiya etmək asandı. Bir həftə içərisində eyni rəqibə qarşı üç oynamaq yorucu olur. Amma inanmıram ki, bunun "Braqa" ilə oyuna təsiri olsun. Hazırlıq planımız var idi.

- Portuqaliyaya yol uzundu. Nə vaxt gedəcəksiz?
- İki gün əvvəl.

- İlk dəfədi ki, eyni komanda ilə üç oyunda qapılara 21 qol vuruldu. Bu, hücumçuların bacarığı, yoxsa müdafiəçilərin səhvləridi?
- Hər iki xəttin bacarığıdı (gülür).

- Toral Bayramovun "Qalatasaray"a keçidi realdı?
- Xeyr. Sizin bildiklərinizdi. Sadəcə yazılardı. Onların direktoru da açıqlama vermişdi ki, heç bir futbolçumuzla maraqlanmırlar.

- Rəsmi təklif olsa, necə?
- Klublar arasında razılıq olarsa, mümkündü.

- Çempionat matçında az adam gəlir, amma "Braqa" ilə görüşdə yəqin ki, stadion dolacaq. Artıq uzun illərdi ki, bu sualı təkrar-təkrar veririk. Demək ki, hələ heç nə dəyişməyib. Sizcə, bu nə vaxt dəyişəcək?
- Deyəcək bir söz tapmıram. Çox istəyərdim ki, azarkeş sayı çox olsun. Futbolçular daha çox istəkli olur, daha baxımlı oyun gedir. Futbol azarkeşsiz bir o qədər maraqlı görünmür. Amma inanın ki, azarkeş az olanda oyun ajiotaj yaratmır. Amma matç 10-15 min azarkeş qarşısında keçiriləndə, daha ajiotajlı görünür. Əfsuslar olsun ki, bunu edə bilmirik. Bilmirəm günahkar bizik, klubdu, yoxsa ümumi futbolumuzdu. Lakin azarkeşlərin gəlməsinə çox ehtiyac var. Futbol azarkeşssiz futbola bənzəmir. Bu, futbolun səviyyəsini çox aşağı salır. Futbolçu 10-15 min azarkeş qarşısında daim oynasa, o hər oyunda 10-15 faiz daha yaxşı oynayar, daha məusliyyətli olar. Mütləq nəsə bir yol tapılmalıdı. Futbol üçün nəsə düşünülməlidi ki, azarkeşlərimiz hansısa formada stadiona gəlsinlər. 10-15 il əvvəl daha çox azarkeş gəlirdi. Azarkeşlər sanki Azərbaycan çempionatından küsüblər. Premyer-liqamızın səviyyəsini qaldırmaq lazımdı. Rəqabəti yaxşılaşdırmaq lazımdı. Ümid edək ki, hər şey yaxşı olacaq və bu sualı yenə verməyəcəksiz (gülür)

- Aleksey İsayevin "Braqa"ya qarşı oynamaq ehtimalı var?
- Komandaya yaxşı adaptasiya oldu. Nə qədər bacarıqlı olsan da, klubun istəklərinə tam riayət edə bilmirsən. Ondan daha yaxşısını gözləyirik. Oyunundan razıyıq. "Braqa" ilə oyunlara gəldikdə, tam heyət bilinmir. Qarşıdakı günlərdə bilinəcək.

- "Xəzər Lənkəran"ın futbolumuza qayıtmaq ehtimalı təsdiqlənib. Stadion təmirə bağlanıb...
- Ancaq alqışlayıram. Lənkəranda oynamaq... Ora başqa motivasiya ilə hazırlaşırdıq. 10-12 min azarkeş olurdu. Sanki avrokubok oyununa çıxırdıq, hazırlaşırdıq. Çox istəyərdim ki, "Xəzər Lənkəran" yenidən qayıtsın. Fikir varsa, alqışlayıram.

- Millimizin Millətlər Liqasında rəqibləri bəlli oldu. Bu haqda nə deyə bilərsiz?
- Məlumat verə bilmərəm. İstər-istəməz bir o qədər yaxından maraqlanmıram. Millimizə uğurlar arzulayıram. Tanış rəqiblərə qarşı oynayanda bəzən bəzi oyunlar daha asan olur. Çünki rəqibin gücünü bilirsən. Bu dəqiqə ciddi olmayan rəqib yoxdu. Hər bir halda, milliyə uğurlar arzulayıb, inanmalıyıq.

- Artıq ikinci matçdı ki, penaltiləri fərqli oyunçular vurur. Bu nədən irəli gəlir?
- Ehtiyat. İlk penalti vuran oyunçuların ehtiyatıdı.

- Avrokuboklarda da belə olacaq?
- Təki, avrokubokalrda da penaltilər olsun, baxarıq.

- "Braqa" haqda nə deyə bilərsiz?
- Topla sürətli olan, dinamik komandadı. İlk dəqiqələrdən oyunu ələ almağa çalışan və sürəti daim artırmağa çalışırlar. Ona uyğunalşamağa və qarşısını almağa çalışacağıq. "Braqa" yaxşı komandadı. Ən azından bilirəm ki, hər iki matç maraqlı olacaq.

- "Qarabağ"ın "Braqa"la oyun planı hazırdı?
- Demək olar ki, hazırdı. Bu gün gecə oyunları var. Bundan əvvəlki oyunlarını analiz edəcəyik. Bəlkə hansısa dəyişiklik oldu. Amma plan hazırdı.