“Daha yaxşı “Qəbələ” görəcəyik”
Ölkə kubokunun 1/4 final mərhələsinin cavab görüşündə “Qəbələ” "Araz-Naxçıvan"ı 2:0 hesabı ilə məğlub edib.
“Football-plus.az” xəbər verir ki, oyundan sonra “qırmızı-qaralar"ın baş məşqçisi Elmar Baxşıyevin mətbuat konfransı keçirilib. Sizi onun fikirləri ilə tanış edirik:
“Yaxşı mübarizəli oyuna şahidlik etdik. Hər iki komanda meydanda mübarizə apardı. Sevindirici haldı ki, oyundan qopmadıq. Komanda hər iki hissədə istədiyimiz oyunu göstərməyə çalışırdı. Düşünürəm ki, layiqli qələbə qazandıq. Yolumuza davam edirik. Komandamı təbrik edirəm”.
- Bu qələbədən sonra artıq tilsimin qırıldığını demək olar?
- Daha yaxşı olmağa çalışmaq lazımdı. Komanda məşqlərdə bizə bunu nümayiş etdirir. Bilirik ki, bu durumdan çıxmalıyıq. Komandaya inanırıq. Getdikcə nəticə və oyun baxımından daha yaxşı "Qəbələ" görəcəyik.
- Ötən mövsüm premyer-liqada qalmaq uğrunda mübarizə aparan "Səbail" kubokda yarımfinala çıxmışdı. Həmin vaxt Şahin Diniyev bildirmişdi ki, premyer-liqada qalmaq üçün kuboku qurban verməyə hazıram. Siz necə düşünürsünüz?
- İndiki halda çətin durumdayıq. Amma nə mən, nə də komanda heç bir turniri ayırmır. Hər iki turnirdə sona kimi çalışacağıq. Qismətdə nə varsa, o da olacaq.
- Transfer gözlənilir?
- Gündəmdədi. Axtarışlarımız davam edir. Düşünürəm ki, transfer mümkündü.
- Legioner limitinin dəyişdirilməsi təklif olunur. Sizin fikriniz necədi?
- İki tərəfdən yanaşmaq olar. Limiti tam götürmək də olar. Büdcəsi yaxşı olan klublar legioner limitinin daha çox olmasını istəyərlər. Amma azərbaycanlı oyunçuları, millini də düşünmək məcburiyyətindəyik. İndiki limit münasibdi. Belə davam etmək daha uyğundu.
Digər xəbərlər
