Budaq Nəsirov “Turan Tovuz”un yetirməsidi.

10 il əvvəl, yəni 2014-cü ildə “evini” tərk edən futbolçu “Araz-Naxçıvan”, “Sumqayıt” və “Kəpəz” kimi komandalarda çıxış edəndən sonra Portuqaliyada “Sportinq”in şərəfini qorudu. Təbii ki, buna şərəfini qorudu demək olarsa... İki il burda forma geyən oyunçu daha sonra sanki qeybə çəkildi. İllər bir-birini əvəzlədikdən sonra bəlli oldu ki, Türkiyədədi. Qardaş ölkədə olarkən hansı işlə məşğul olduğu haqda müxtəlif şayiələr yayıldı ki, bu mövzuya toxunmaq yersizdi. Hər halda, Budaq özü ötən il “Futbol+”ə müsahibəsinə bütün iddiaları təkzib etmişdi. “Düzünü Allah bilir” deyib əsas məsələyə qayıdaq.

2023-cü ilin yayında “Turan Tovuz” Nəsirovla müqavilə imzaladı. Şərtlər sadə idi. 27 yaşlı yarımmüdafiəçi qarşıdakı 3 ildə komandanın şərəfini qorumalıydı. Amma işlər sanki düyünə düşdü. Budaq Türkiyədən iki il müddətinə deportasiya edildiyinə görə komandanın yay və qış təlim-məşq toplanışlarına qoşula bilmədi. Xatırlayırsızsa, bununla bağlı vəkil Elcan Həsənlidən açıqlama almışdıq. O, bizə belə durumlarda futbolçunun aidiyyatı orqanlara müraciət edərək xoşagəlməz durumdan xilas ola biləcəyini demişdi. Yəni birbaşa məsuliyyət klub rəhbərliyinin üzərində deyildi. Anlaşılır ki, bu problemin uzanmasının günahkarı məhz Nəsirovdu.

Bundan başqa, “Turan Tovuz”un baş məşqçisi Ayxan Abbasov dəfələrlə oyunçunun tam hazır olmadığını deməklə ona şans verilməməsinin səbəbini izah edib. Bu prosesi sürətləndirmək məqsədilə Budağın əvəzedici heyətdə meydana çıxmasına şərait yaradılmışdı. Təəssüf ki, o, bu şansı da düzgün dəyərləndirmədi. Şəxsi münasibətlərdəki problemi stadiona daşıyaraq komanda yoldaşı Elxan Qasımovla dalaşdı. Belədə “Turan Tovuz” futbolçuyla müqaviləyə xitam verdi. Əvəzedici heyətin baş məşqçisi Nizami Ocaqverdiyevin saytımıza açıqlamasını da xatırladaq: “Budaq günahkardı. Məsuliyyət daşımalıdı”. Bəs Elxan? Klubun məhz Nəsirovla rəsmi münasibətə son verməsi Nizami bəyin fikirlərini təsdiq etmək mahiyyəti daşıyır.

Son olaraq, futbolçu karyerasına 1-ci liqa təmsilçisi “Karvan”da davam edəcək. Maraq üçün qeyd edək ki, Yevlax təmsilçisi hələ sentyabrda Budağa təklif göndərmiş, lakin o, kluba premyer-liqada qalmaq istədiyini demişdi...
Ümumiyyətlə, Budaq azərbaycanlıdı, futbolumuzun yetirməsidi. Loru dildə desək, özümüzküdü...

Heç kimə karyerasında belə uğursuzluq arzulamırıq. Amma Ayxan Abbasov demişkən, hər şey Budaqdan asılı idi. O isə bacarmadı. Baltanı öz kökünə vurdu!

KƏNAN BAHADIR