“Qarabağ” “Sabah”la taleyini həll edib. Qalan qarşılaşmalarınn isə maraqlı keçəcəyini gözləyirəm. Çünki “Zirə” ilə “Neftçi” rəqibini minimal hesabla məğlub edib. Həm də səfər qolu anlayışı ləğv edilib. Buna görə də hər üç görüş maraqlı olacaq. Bu oyunlarda hansısa komandanı favorit göstərə bilmirəm. Amma onu deyə bilərəm ki, ilk oyunda qalib gələnlərin müəyyən üstünlüyü var”.

“Kubok oyunlarını izlədim. Demək olar ki, “Sabah”dan başqa qalan komandaların şansı bərabərdi. Bildiyiniz kimi, kubok oyununda “ev, səfər” prinsipi ləğb olunub. Avropa Liqasına vəsiqə qazanmaqdan ötrü ən qısa yol budu. Bunu da bütün komandalar dərk edir. Ona görə də hamısı özünü yaxşı göstərməyə çalışır. Əsasən də aşağı pillələrdə qərarlaşan komandalar bu mübarizədə daha iddialıdı. Buna görə də komandaların şanslarının yarı-yarıya olduğunu düşünürəm. Oyun baxımından isə onu deyə bilərəm ki, qarşılaşmaların hamısı bərabər səviyyədə keçdi. Əlbəttə, “Qarabağ” istisnadı. Məsələn, “Neftçi” ilk hissəni 3 top öndə başa vursa da ikinci hissədə əvəzetmələrdəki tələskənliyinə görə bu fərq minimuma endi. “Zirə”yə gəlincə, ilk hissədə üstünlüyə sahib oldular, ikinci hissədə isə onlara qələbə qazandıran qolları vurmağı bacardılar. Amma cavab görüşü barədə dəqiq fikir söyləyə bilmərik. Hər qədər “Zirə”nin müəyyən üstünlüyü olsa da, “Səbail”in də bir o qədər şansı var. “Qəbələ” barədə isə onu deyə bilərəm ki, ötən mövsümdəki komandadan indi əsər-əlamət yoxdu. Doğrudu, “Qəbələ” vaxtilə bu kuboku qazanıb. Lakin indi komandada o perspektivi görmürük. Sadəcə, elitada qalmağa çalışan bir komanda görürük. Doğrusu, “Qəbələ” kimi akademiyası, meydançası, şəraiti olan bir komandanın elitadan düşməsini istəmərəm. Buna görə də onlara uğurlar arzulayıram. Dediyim kimi, bütün komandaların var qüvvəsiylə oynayacağını, kubok üçün gərgin mübarizə gedəcəyini düşünürəm. Amma fikrimcə, “Qarabağ” bu mövsüm həm çempionatı, həm də ölkə kubokunu qazanmaqla “qızıl dubl” edəcək”.

“Hər oyunu ayrı-ayrılıqda şərh edəcəm. İlk növbədə “Səbail” – “Zirə” (1:2) matçının ədalətli nəticəylə yekunlaşdığını deyə bilərəm. Çünki oyunda üstün tərəf “qartallar” idi. Ona görə də bu cütün taleyinin həll olduğunu düşünürəm. İnanmıram ki, “Zirə” doğma meydandakı cavab görüşündə “Səbail”ə məğlub olsun. İndiki duruma görə də “Zirə” “Səbail”dən bir addım daha öndədi. “Sabah” – “Qarabağ” (1:7) oyunu barədə artıq danışmaq istəmirəm. Mübarizənin taleyi artıq həll olunub. Cavab görüşü, sadəcə, rəmzi xarakter daşıyacaq. Həm də “Qarabağ” çempionatdakı oyunuyla da rəqib tanımadığını göstərir. Təbii ki, mərhələ adlayan tərəf də ağdamlılar olacaq. “Araz-Naxçıvan” – “Qəbələ” (1:1) cütünün taleyinə cavab görüşündə aydınlıq gələcək. Bu iki komanda arasında bərabər mübarizənin şahidi olduq. Amma kubok oyunlarındakı təcrübəsinə və cavab görüşünü doğma meydanda keçirəcəyinə görə “Qəbələ”nin bir qədər şanslı olduğunu düşünürəm. Samir Abasov “Sumqayıt” – “Neftçi” (2:3) oyunundan əvvəl verdiyi açıqlamada komandasının əsas gücünü çempionata yönəltdiyini bildirmişdi. Bu qarşılaşmada da belə göründü. Bu mərhələni “ağ-qaralar”ın adlayacağını düşünürəm. Həm “Neftçi”nin heyətinin “Sumqayıt”la müqayisədə daha geniş olması, həm də bakılıların səfərdə qalib gəlməsi buna təkan verən amillərdəndi. İnanmıram ki, “kimyaçılar” geridönüş edə bilsin”.