Ölkə kubokunun 1/4 mərhələsi başa çatdı. Xatırladaq ki, 1/8 finaldan fərqli bu dəfə komandalar iki matçın nəticəsinə görə qalibi müəyyənləşdirdi.

Football-plus.az xəbər verir ki, dekabrın 19-da azarkeşlər iki oyuna şahidlik etdi. Qəbələdə keçirilən görüşdən əvvəl çoxları “Qarabağ”ın şansını yüksək qiymətləndirirdi. Baxmayaraq ki, Bakıda keçirilən ilk matç 2:2 hesabı ilə başa çatmışdı. Ehtimalların əksinə, Elmar Baxşıyevin çalışdırdığı komanda sürpirizə imza atdı. “Qırmızı-qaralar” intizamlı oyunla “köhlən atlar”ı mübarizədən kənarlaşdıra bildi. Ramon Maçadonun qolu qarşılaşmada həlledici oldu.

Günün ikinci qarşılaşmasının nəticəsi də hamını təəccübləndirdi. “Səbail” ilk görüşdə “Sabah”ı üstələyərkən əksəriyyət bunu “tələbələr”in azlıqda qalması və bəxt amili ilə əlaqələndirsə də, Masazırdakı oyunda Mahmud Qurbanov və yetirmələri futbolda təsadüfün olmadığını sübut etdi. “Dənizçilər” Murad Musayevin çalışdırdığı komandanı ardıcıl ikinci dəfə məğlub etməklə adını yarımfinala yazırdırmağı bacardı.

İkinci oyun günündə ilk görüş Tovuzda keçirildi. Gəncədə baş tutan matçda “Turan Tovuz” “Kəpəz”i məğlub etməklə müəyyən üstünlük qazansa da, cütün taleyinə məhz Tovuzda aydınlıq gəlməliydi. Maraqlı və gərgin keçən 90 dəqiqədə futbol adına hər şey var idi. Vurulan 4 qol, mübahisə doğuran hakim qərarı, futbolçular arasında dava-dalaş... Ancaq sonda sevinən tərəf “boz qurdlar” oldu. İlk oyundakı 1 top üstünlüyü ilə əldə olunan qələbə Ayxan Abbasovun komandasını yarımfinala daşıdı.

Dekabrın 8-də Zirədə keçirilən oyunda eyniadlı komandaya minimal hesabla uduzanda, demək olar ki, 7-dən 77-yə hər kəs “Neftçi”ni asıb-kəsirdi. Ancaq həmin adamlar unudurdu ki, kubok duelləri iki oyundan ibarətdi. “Bakcell Arena”da keçirilən cavab görüşündə “ağ-qaralar” favorit adını doğruldaraq rəqibi məğlub etməyi bacardı. Düzdü, qarşılaşmanın taleyi əlavə vaxtda həll olundu. “Zirə” “Neftçi” azarkeşlərinin əsəbləri ilə oynamağı bacardı. Ancaq istənilən halda paytaxt təmsilçisi cütün qalibi kimi yoluna davam edəcək.

Kubok qarşılaşmaları bir daha göstərdi ki, futbol arxayınlaşmağı, “boşalmağı” sevmir. 1/4 finaldan öncə, demək olar, hamı “Qarabağ”ın “Qəbələ”ni, “Sabah”ın “Səbail”i asanlıqla keçəcəyini düşünürdü. Ancaq yekun nəticələr tam fərqli oldu. Yarımfinal oyunları isə gələn ilin aprelində keçiriləcək. Ona kimi hələ xeyli vaxt və ən əsası komandaların ixtiyarında bir “transfer pəncərə”si var. Kağız üzərində “Neftçi” titul qazanmağa yaxın görünsə də, digər yarımfinalçılar da qış fasiləsində heyəti gücləndirib avrokuboklara vəsiqə qaznamaq üçün ən qısa yoldan maksimum yararlana bilər.
Azərbaycan kuboku

1/4 final, cavan oyunları

19 dekabr
Qəbələ - Qarabağ 1:0
(ilk oyun - 2:2)
Sabah – Səbail 0:1
(ilk oyun - 2:3)

20 dekabr
Turan Tovuz – Kəpəz 2:2
(ilk oyun - 2:1)
Neftçi – Zirə 3:1
(ilk oyun - 0:1)

Yarımfinal oyunları aprelin 19-u və 27-də keçiriləcək:

Qəbələ - Səbail
Turan Tovuz – Neftçi.

RƏŞAD