''Barselona'' rəhbərliyi ilə Xavi Ernandes arasında yeni müqavilə ilə bağlı danışıqlar prosesində problem yaranıb.

"Football-plus.az" xəbər verir ki, Xavi məvacibinin artırılmasını tələb etməklə rəhbərliyi təəccübləndirib.

43 yaşlı mütəxəssisin konkret hansı məbləği tələb etməsi barədə məlumat verilməsə də, deyilənə görə, o, əvvəlkindən iki dəfə çox maaş istəyib.

Klubun maddi durumunun heç də ideal olmadığını və üstəlik bu yay Lionel Messinin də ''Barsa''ya qayıtmaq ehtimalının olduğunu nəzərə alsaq, rəhbərliyin Xavinin tələbinə necə reaksiya verəcəyi bilinmir.

Qeyd edək ki, bu mütəxəssisin Kataloniya nəhəngi ilə indiki müqaviləsinin müddəti 2024-ün yayında başa çatacaq. Tərəflər müqavilənin 2026-ya qədər yenilənməsi ilə bağlı danışıqlar aparırlar.

Bir müddət öncə prezident Xuan Laporta Xavi ilə yeni müqavilə imzalayacaqlarına şübhə etmədiyini bildirmişdi. Komanda bu mövsüm bu mütəxəssisin başçılığı altında digər turnirlərdə uğursuz çıxış etsə də, La Liqada sona 4 tur qalmış çempionluğu rəsmiləşdirdi.