Xavi: “Qarşıya qoyulan hədəfə çatmasaq, ayrılacam”
La Liqanın son çempionu statusunda olmasına baxmayaraq, cari mövsümü o qədər də inamlı keçirməyən “Barselona”da baş məşqçi Xavi Ernandesin kreslosu ciddi şəkildə laxlamağa başlayıb.
“Football-plus.az” xəbər verir ki, xüsusilə də İspaniya superkubokunun finalında əzəli rəqib “Real” önündə yaşanan fiaskodan sonra ona yönələn təzyiq artıb. Bu arada İspaniyanın “Mundo Deportivo” nəşrinin iddiasına görə, 43 yaşlı mütəxəssis gələcək taleyi haqda danışarkən hədəflərinə çata bilməyəcəyi təqdirdə mövsümün sonunda ayrılacağını bildirib. Xavi bunları deyib:
“Bura gəldiyim ilk mövsümdə qarşımıza 4-cü yeri tutmaq hədəfi qoyulmuşdu. Biz isə ikinci yeri tutduq. Ötən mövsüm qarşımıza çempionluq hədəfi qoyulmuşdu və biz də buna nail olduq. Bu mövsüm isə hədəf vacib turnirlərdən, yəni kubok, La Liqa və ya Çempionlar Liqasından birini qazanmaqdı. Bu hədəfə çatmasam, mövsümün sonunda ayrılacam. Amma “Barselona” indi uğursuzluqdan daha çox uğur qazanmağa yaxındı”.
Kataloniya nəhəngi hazırda daxili birincilikdə 3-cü pillədə qərarlaşıb və bir oyun az keçirməklə lider “Jirona”dan 8 xal geridədi. Kubokda komanda yoluna davam edir. ÇL-də isə “Barsa” 1/8 finalda “Napoli” ilə qarşılaşacaq.
Maraqlıdı ki, “Barsa”nı çalışdırmağa namizəd olan məşqçilərdən biri srağagün “Roma”dan qovulan Joze Mourinyodu. “El Nasional” nəşrinin iddiasına görə əsas namizəd “Barselona”nın ikinci komandasını çalışdıran Rafael Markesdi. İkinci namizəd Mourinyo, üçüncü namizəd isə “Bolonya”nın baş məşqçisi Tyaqo Mottadı. Hər üç ismin keçmişdə “Barselona” ilə əlaqəsi olub. Markeslə Motta bu klubda futbolçu kimi top qovub. Mourinyo isə bilindiyi kimi, ötən əsrin sonlarında “Barsa”da həm tərcüməçi, həm də Lui van Qalın köməkçisi kimi çalışıb. Amma bəzi mənbələr iddia edir ki, prezident Xoan Laporta keçmiş dönəmlərdə, xüsusilə “Real”ı çalışdırdığı müddətdə “Barsa”nın əleyhinə dəfələrlə qalmaqallı açıqlamalar verən Mourinyonun baş məşqçi postuna gətirilməsinin əleyhinədi.
Digər xəbərlər
