“Turan Tovuz”a məğlubiyyətdən sonra “Səbail”in müdafiəçisi Yusif Nəbiyev “Football-plus.az”a müsahibə verib O, əvvəlcə oyunu dəyərləndirib:

- Məğlub olmuşuq, oyun barədə danışacaq çox söz yoxdu. Çətin olacağını bilirdik. Çünki “Turan Tovuz” yaxşı komandadı. Həm də evdə xüsusilə yaxşı oyun nümayiş etdirirlər. İlk hissədə komanda olaraq yaxşı oynamadıq. İkinci hissədə geridönüş etmək istəsək də, alınmadı. Bu da futbolun bir hissəsidi. Udmaq da var, uduzmaq da. Əsas olan bundan sonra toparlanmağımızdı.

- “Zirə” ilə oyunda da qalib gələ bilmədiz. Qış fasiləsindən sonra 2 oyuna 1 xal gözlənilən idi?
- Bütün komandalar kimi, biz də qələbə qazanmaq istəyirik. Sadəcə, alınmayanda alınmır. Yalnız irəli baxmaq lazımdı. Çünki geri baxanda nəsə etmək olmur. Kaş uduzmazdıq.

- Səncə, komandada nə çatışmadı?
- Bütün tapşırıqları məşqçilərimiz verir. Sadəcə, bu gün o tapşırıqları icra edə bilmədik və nəticədə məğlub olduq. “Turan Tovuz”u təbrik edirəm. İnşallah, növbəti matçlarda qələbə qazanarıq.

- Komandanın “axsadığı” mövqe hansıdı?
- Ümumilikdə bu gün yaxşı oynamadıq. İstər müdafiə, istər yarımmüdafiə, istərsə də hücumda, bir sözlə, komanda olaraq məğlub olduq. Yəni sırf kiminsə səhvinə görə uduzmadıq.

- Rəqibin vurduğu 2-ci qolla bağlı nə deyə bilərsən? Çünki futbolçular hakimə narazılığını bildirirdilər.
- Mənim nəsə deməyim heç nəyi dəyişməyəcək. Nəticədə qol qeydə alınıb və məğlub olmuşuq.

- Avrokuboklara vəsiqə üçün oynaya bilərsiz?
- Şansımız var, bundan da istifadə etməyə çalışacayıq. İndidən dəqiq nəsə deyə bilmərəm. Lakin bizim qarşımıza elə bir məqsəd qoyulmayıb ki, komanda yalnız Avropa Liqasına getməlidi. Əlimizdən gələn qədər üst pillələr uğrunda çalışacağıq.

KAMAL SƏFƏR