“Bəli, qış fasiləsindən sonra ilk oyunlarda hakim idarəçiliyi ilə bağlı problemlər yenidən baş qaldırıb, məşqçilər görüşlərdən sonra haqlı narazılığını bildirir. Məncə, epizodlar üzərində detallı dayanmağa ehtiyac yoxdu. Çünki indiyə qədər çox müzakirələr aparılıb. Bir oyun, bir epizod olsa, bu, fərdi hakim səhvi kimi qəbul edilə bilər. Lakin turun bir çox qarşılaşmasında idarəçiliklə bağlı problemlər yaşanırsa, deməli, durum ümumidi və bəhs etdiyimiz xoşagəlməz mənzərə hakimlik sistemində mövcud vəziyyətin əyani göstəricisidi. Məsələyə kompleks yanaşmadan nöqsanlar aradan qaldırıla bilməz! Səbəblərin araşdırılması üçün əhatəli təhlilə ehtiyac duyulur. Amma ölkə çempionatlarında hakimlik adına heç vaxt belə rahat şərait olmayıb”.

“Təşkilati işlər, stadionlarda təhlükəsizlik, ideal meydanlar, nəinki faktiki, hətta psixoloji təzyiqin olmaması, boş tribunalar, komandaların bir-birinə münasibətdə nümunəvi davranışı, VAR sistemi və başqa amillər oyunlarda idarəçiliyin yüksək səviyyədə olmasına zəmin yaradır. Belə şəraitdə bu qədər narazılıq yaranması yolverilməzdi! Hakimlər Komitəsinin rəhbəri Barış Şimşək Antalya toplanışından ağızdolusu nə qədər danışsa da, oyunlarda başverənlər fərqli mənzərəni ortaya çıxarır. Deməli, problem, öncə ümumi futbol, hakim idarəçiliyi sistemindədi. Bunlar aradan qaldırılmadan hakimlikdə səhvlər minimuma endirilə bilməz! Problemin kökü meydanda başverənlərdən qaynaqlanmır, idarəçilik mexanizminin işlək olmamasından, futbol təsərrüfatı sisteminin daxilindən gəlir”.

“Qəbulolunmaz məqamlardan biri Barış Şimşəyin hakimlərin təlim-məşq toplanışına əcnəbi mütəxəssislərin cəlb edilməsini bəh-bəhlə təqdim etməsidi. Sanki Azərbaycan bu sahədə geridə qalmış ölkələr sırasındadı. Dünya çempionatının, Olimpiya Oyunlarının, Qitələrarası kubokun final oyunlarını idarə edən, zəngin təcrübəyə, hakimlik ənənələrinə malik olan ölkəmizə, futbolumuza, hakimlik sahəsinə yuxarıdan aşağı baxmaq təhqirdi. Bunun da əsas səbəblərindən biri futboldan, hakimlikdən anlayışı olmayan insanların rəhbər vəzifələrdə, mühüm postlarda çalışmasıdı. Belə durumu görəndə barışlar, stuxliklər özünü “professor” sayır. Təəssüf ki, oxşar durum əksər klublarda da hökm sürür, ona görə də özlərini müdafiə edə bilmirlər. Gənc, perspektivli hakimlərimiz yetərincədi, onlarla çalışmaq lazımdı. Bunun üçün Hakimlər Komitəsində işə yanaşma dəyişməli, bu sahəyə nəzarət mexanizmi güclədirilməlidi. Bəhanələrlə, səhvləri ört-bastır etməklə problem aradan qaldırılmır, daha da dərinləşir. Belə davam edəcəyi halda, çempionat hələ çox qalmaqal yaşanacaq”.