Tahir Süleymanov Xorvatiyadan olan briqadanı bəyənib - AÇIQLAMA
"Neftçi"nin "Rapid"i 2:1 hesabıyla üstələdiyi matçı isə Xorvatiyadan olan hakimlər briqadası idarə etdi.
Football-plus.az xəbər verir ki, 90 dəqiqə ərzində ciddi narazılığa səbəb olan epizodlar yaşanmadı. Ekspert kimi müraciət etdiyimiz Tahir Süleymanov da idarəçiliyin yaxşı olduğunu söylədi:
"Hakim idarəçiliyi adına asan oyun deyildi. Bir tərəfdə UEFA klub əmsalları cədvəlində ilk “10-luq”da olan Avstriya təmsilçisi, digər tərəfdə dolu tribunalı, istəkli, qələbə arzulayan "Neftçi". İlk dəqiqələrdən açıq futbol izlədik, komandalar oyuna kəşfiyyatsız başladı. Belə görüşlərdə, qarşılıqlı hücumlarda hakimlər briqadasının üzərinə böyük yük düşür. Baş hakim daim hərəkətdə olmalı, epizodlara özünü çatdırmalıdı. Qarşılıqlı hücumlar şəraitində keçən oyunlarda referilərin fiziki güc sərf etdiyi anlarda doğru qərarların verilməsi də çətinləşir. Xorvat hakim bunun öhdəsindən gələ bildi. Oyunun tempindən çəkinmədi, komandaları fitə "otuzdurmadı", xırda follarla sürəti aşağı salmadı. Futbolçulara sona kimi mübarizə aparmağa şərait yaradılırdı. Birinci hissədə göstərilən sarı vərəqələr yerində idi. Fasilədən sonra da oyunun məcrası dəyişmədi, qonaqlar xeyli fəallaşsa da, "Neftçi" kəsərli əks-hücumlar təşkil edir, imkan daxilində öndə pressinq edirdi. Xırda səhvləri nəzərə almasaq, komandalar referinin idarəçilik tərzini, obyektivliyini, qərarlarını şəksiz qəbul edirdilər. Vurulan qollarda hansısa mübahisənin yaşanmaması da rəqib futbolçuların bir-birinə qarşı korrekt oyunu ilə yanaşı, hakimlərin də hesabına yazılmalıdı. Matçın gərginliyini nəzərə aldıqda, xorvat referi görüşü yaxşı səviyyədə idarə etdi. "Neftçi"ni səfərdə çətin oyun gözləyir. İnanmaq istərdik ki, hakimliyin səviyyəsi ən azı Bakıdakı kimi olacaq".
ABDULLA İSMAYILOĞLU
