Bu oyun ətrafında hələ xeyli əvvəldən ajiotaj yaranmışdı ki, bunun da səbəbları “Kəpəz” idi.

Gəncə klubu Tovuzda yerli azarkeşlərin təzyiqi ilə üzləşəcəyini bildiyindən oyunun Qəbələdə keçirilməsini israrla istədi. Zaman bu qərarın doğru olduğunu göstərdi. Baxmayaraq ki, tovuzlu azarkeşlər yenə çox idi, baxmayaraq ki, artıq 4-cü dəqiqədə Ayxan Qusayev yaxın məsafədən zərbə ilə hesabı açmışdı. Daha bir maraqlı məqam Qərb təmsilçilərindən birinin toplanışı Türkiyədə, o birini vətəndə keçirməsi idi. Əslində futbolçulardan biri, konkret bu oyunda Faiq Hacıyev heç nədən məsuliyyətsizlik edib komandasını azlıqda qoyursa, toplanışın yerinin heç bir önəmi qalmır.

Faiq meydandan qovulandan sonra gəncəlilərin fəallaşacağı aydın idi. Nominal meydan sahibləri həm hücumların, həm də qapıya zərbələrin sayını artırdı. Artıq təcrübəli Kamal Bayramov ustalığını tez-tez göstərməyə məcbur olurdu. Amma o da Şakir Seyidovun 25-ci dəqiqədə yaxın məsafədən tirin altına zərbəsi zamanı aciz qaldı. Qoldan ruhlanan gəncəlilər təzyiqi bir qədər də artırdı. Hissənin sonuna yaxın Kamal Papunaşvilinin zərbəsini gözəl seyvlə dəf etdi.

İkinci hissədə hava şəraitinin pisləşməsi futbolçular üçün çətinlik yaradırdı. Kim səhv edəcəkdisə, o da uduzacaqdı. Buna qədər inamlı təsir bağışlayan Kamal 71-ci dəqiqədə topu oyuna daxil edərkən səhvə yol verdi. Dərhal sürətli əks-hücum quran gəncəlilərin kombinasiyasını Martins qolla tamamladı. Tovuzluların hesabı bərabərləşdirməyə gücü qalmamışdı.

Gözdən qaçmadı
* Qəbələdə keçirilən bu oyunda tovuzlu azarkeşlər gəncəli azarkeşlərlə müqayisədə iki dəfə çox idi.
* “Kəpəz”dən Mahir Həsənov ehtiyat oyunçular skamyasından hakimin qərarına kəskin etiraza görə sarı vərəqə ilə cəzalandırıldı.
* Kvirkviya Cəfərovla əvəzlənməsindən narazı qaldı.

KAMAL SƏFƏR