"Araz-Naxçıvan" U-21 millimizin üzvünü transfer etdi
“Araz-Naxçıvan” dövrələrarası fasilədə transfer işlərini davam etdirir.
"Football-plus.az" xəbər verir ki, Naxçıvan təmsilçisi Ramin Nəsirli ilə anlaşıb.
21 yaşadək futbolçulardan ibarət millimizin də üzvü olan sağ cinah yarımmüdafiəçisi ilə “6 ay + 1 il” müddətinə anlaşma imzalanıb.
“Neftçi”nin yetirməsi olan Ramil Nəsirli bir müddət Latviyanın güclülər dəstədində iştirak edən “Daugavpils” klubunda legioner həyatı yaşayıb. 2023-cü ilin fevralında bu kluba keçən futbolçu ötən ay geri dönüb.
Ramil “Araz-Naxçıvan”a keçidi ilə bağlı klubun saytına açıqlama verib. O, bunları deyib:
“Baş məşqçi ilə görüşdük, məni komandada görmək istədiyini bildirdi. Dəvətə və etimada görə ona təşəkkür edirəm. Üzərimdə çalışacam, məqsədim əsas komandada meydana çıxmaq, daimi oynamaqdı. Bilirəm, mövqeyimdə rəqabət var, ancaq bura ehtiyatda oturmaq üçün gəlməmişəm. Başqa klublardan da təkliflər var idi. Latviyadan və yerli klublarımızdan dəvət almışdım, ancaq “Araz-Naxçıvan”ın oyun üslubu daha cəlbedici olduğuna görə, bu komandanı seçdim. Kollektiv də məni mehriban qarşıladı. Artıq iki məşqdə iştirak etmişəm. Gördüklərim məni qane edir”.
Qeyd edək ki, “Araz-Naxçıvan” bir neçə gün əvvəl İldar Alekperovu “Sabah”dan icarəyə götürüb.
Digər xəbərlər
