“Əslində neçənci dəfədi ki, “Qarabağ”ın heyətində oynamış futbolçular başqa ölkələrin klublarının diqqət mərkəzinə düşür. Bu baxımdan fikir versək, görərik ki, Rusiya klubları sanksiyalarla üzləşəndən sonra daha çox bizim çempionatın liderləriylə maraqlanır. Leandroun adınını Çin klubuyla hallanmasına müsbət hal kimi yanaşmaq olar. Maraqlıdı ki, “Qarabağ” onun transferi üçün çox pul xərcləməmişdi. Amma indi bir neçə milyon avro qazancdan söhbət gedir. Kadi Borges, Ovusu Kvabena, İbrahima Vaci kimi futbolçular da bu sırada olub. Görünür, “Qarabağ”ın biznes siyasəti çox yaxşı davam edir. Klub minimum xərclə oyunçu alıb inkişaf etdirir, daha sonra sataraq yaxşı pul qazanır. Ümid edirik ki, bu sistemdən başqa klublarımız da istifadə etməyə başlayacaq. Hazırda turnir cədvəlinin son beş pilləsində olanlar keyfiyyətli futbolçularını ilk “beşlik”də qərarlaşanlara satır. Məsələn, bu cəhətdən “Qəbələ”ni qeyd etmək olar. Daha əvvəl komandalar bir-birinə futbolçu satmaq istəmirdi ki, rəqiblər güclənməsin. İndi qazanc üçün belə addımların atılması müsbət haldı. Leandro Andradenin mümkün transferinə gəlincə, proses davam edir. Tərəflər mövzuya yetərincə ciddi yanaşır. Yəqin ki, tezliklə ortaq məxrəcə gələcəklər. Bəhs etdiyimiz oyunçu gənc və perspektivlidi. Çox güman, indi müqavilənin şərtləri razılaşdırılır. Məsələn, “Qarabağ” futbolçunun növbəti satışından pay almaq istəyə bilər. Yəni Andradedən maksimum qazanc əldə etmək niyyətindədi ki, bu da təbiidi. Transferin reallaşacağına inanmağımın başqa səbəbi isə klubun oyunçularını əsasən qışda satmasıdı. Belədə futbolçunun yeni komandasına uyğunlaşmaq, özünü yaxşı tərəfdən göstərmək üçün bir neçə ay vaxtı var. Bundan başqa, “Qarabağ” da onu müşahidə altında saxlayır. Belədə mümkündü ki, növbəti illərdə həmin oyunçunu yenidən komandaya qaytarsın. Bu haqda müqaviləyə bənd əlavə edilməsi də mümkündü. Ümumiyyətlə, vurğuladığım məsələlər razılaşdırıldıqdan sonra transfer həyata keçiriləcək”.