“Qarabağ”ın futbolçusu Leandro Andradenin klubdan ayrılmaq ehtimalı haqda yazmışdıq.

Xatırladaq ki, yarımmüdafiəçinin xidmətində maraqlı olan “Şanxay Şenxua” “köhlən atlar”a 2 milyon, hətta bəzi qaynaqlara inansaq, 2,5 milyon avro ödəmək niyyətindədi. Lakin Ağdam təmsilçisi bu təkliflə razılaşmaq istəmir.

Andradenin meneceri Eduardo Oliveyra deyir ki, oyunçunun ağdamlılarla müqaviləsində 2,5 milyon avroluq sərbəst qalmaq bəndi var. Klub isə 2,6 milyon təklif edir. Oliveyranın həqiqəti danışıb-danışmadığını öyrənmək məqsədilə “Qarabağ”ın mətbuat xidmətinin rəhbəri Anar Hacıyevlə əlaqə saxladıq. O, “Football-plus.az”a qısa cavab verdi: “Olsaydı, yəqin ki, getmişdi”.

Yəni yoxdu? Xeyr, var... Amma məsələ bir qədər fərqlidi. Belə ki, 2,5 milyon avroluq sərbəst qalmaq bəndi yay “transfer pəncərəsi” üçün keçərlidi. Yəni “Qarabağ” Kabo-Verdedən olan futbolçu ilə 2022-ci il yanvarın 13-də imzaladığı müqaviləyə qışda yox, yalnız yayda 2,5 milyon avro müqabilində gedə biləcəyi ilə bağlı bənd salıb. Beləliklə, Qurban Qurbanov nə desə, o da olacaq. Baş məşqçi isə Andradenin qalmasını istəyir. Hədəf həm çempionluğu mümkün qədər vaxtından əvvəl təmin etmək, həm də “Braqa” ilə oyunlarda yaxşı nəticəyə nail olmaqdı.

KƏNAN BAHADIR