“Birincisi, onu deyim ki, belə mənzərənin ortaya çıxması adamı çox sevindirir. Xatırlayırsızsa, “Qarabağ” Kadi Borgesi 5 milyon avroya satıb əla gəlir əldə etmişdi. Ümumiyyətlə, Ağdam təmsilçisinin futbolçuları üçün daim təkliflər olur. Deməli, işlər düzgün qurulub. Hər bir azərbaycanlı proseslərin belə axarını izləyərkən qürur hissi keçirir. Həqiqətən Qurban Qurbanovun yetirmələrinə tələbat var. Məsələn, indi Antalyadayam. Müxtəlif ölkələrdən futbol menecerləri gəlib. Onlar bu şəhərdə təlim-məşq toplanışı keçən futbolçuları izləyir. Mənə dəfələrlə Leandro Andrade, Abdulla Zubir və Julio Romao üçün müraciət ediblər, maraqlanıblar. Hər biriylə söhbətdə “Qarabağ”ın oyunçularını aşağı qiymətə satmayacağını qeyd etmişəm. Bu klub böyük pullar qazanmağa çalışır ki, həm gedənlərin yerini doldura bilsin, həm də daha keyfiyyətli futbolçular transfer etsin. Şəxsən mənim fikrimcə, Andrade Çin klubunun təklif etdiyi pula dəymir. Oyunçunun da gedib orda özünü “Qarabağ”dakı kimi göstərə biləcəyi şübhə altındadı. Məsələn, Ramil Şeydayev “Sabah”ın əvəzedici heyətinə qədər düşmüşdü ki, Qurban Qurbanov onu “diriltdi”. Həmçinin Andrade Bolqarıstanın ortabab klubundan (“Çerno More” – red.) alınmışdı, Ağdam təmsilçisində ulduzu parıldadı. Belələrinin sayı az deyil. Başqa komandalarda meydana çıxmaq şansı əldə edə bilməyənlər gəlib “Qarabağ”da yüksək səviyyəli futbolçuya çevrilir. Leandroya görə kluba 3 milyon avro veriləcəksə, bu, çox yaxşı məbləğdi. Problem odu ki, qarşıdan Avropa Liqası çərçivəsində “Braqa” ilə oyunlar gəlir. Hazırda Ağdam təmsilçisinin təcili şəkildə yeni futbolçu axtarışında olduğunu düşünürəm. Hətta bəlkə də tapıblar. Məncə, Qurban Qurbanovun bu planı baş tutsa, Leandro satılacaq. Çoxu bilir ki, oyunçu üçün həmin qiymət yetərincə çoxdu”.