"Real baxsaq, Nicatın bu turnirdə qələbə şansı, təəssüf ki, lap azdı. Nicat reytinqə görə yarışın aşkar autsayderidi. Abasov hazırda dünya reytinq sıralamasının 100-cü pilləsində qərarlaşıb. Onun rəqibləri Karuana 2-ci, Nakamura 3-cü, Nepomnyaşi 5-ci, Firuzca isə 6-cı yerdədi. Təsəvvür edin ki, Nicatı Kanadada necə çətin mübarizə gözləyir. Bəlkə də məhz bu amil Nicata bu yarışda daha rahat oynamağa imkan verəcək. Çünki Abasov adlı-sanlı rəqiblərinin üzərində olan qədər təzyiq hiss etməyəcək. Çünki Nicat hansı nəticə göstərəcəyindən asılı olmayaraq, çətin ki, onu qınayan tapıla. Razılaşaq ki, bu turnirdə iştirakın özü elə nəyə desən, dəyər. Belə şans Nicat səviyyəsində şahmatçılar üçün bəlkə də həyatda bir dəfə olur və ümid edək ki, Nicat bu şansı maksimum dəyərləndirməyə çalışacaq.

Nicat artıq ötən ay elan edib ki, İddiaçılar turnirinə qədər heç bir yarışa qatılmayacaq və bütün gücünü hazırlığa sərf edəcək. Nicata bu yarışda həyəcanlanmamaq və bacardığını rahat şəkildə ortaya qoymaq lazımdı. Üzərində əlavə təzyiq olmadığından, başqa şahmatçılarla müqayisədə daha rahat oynayacaq. Yalnız bu halda Nicatdan uğurlu çıxış gözləyə bilərik. Federasiyanın şahmatçımız üçün nə etdiyini dəqiq bilmirəm, lakin əminəm ki, bu qurumdan asılı nə varsa, artıqlamasıyla edəcəklər. Mahir Məmmədovun federasiyaya gəlişindən sonra ölkədə şahmata və şahmatçılara diqqət-qayğı ən üst səviyyəyə qalxıb. Bu hər kəsə məlumdu və bunu heç kim inkar edə bilməz. İnanıram ki, federasiya və şəxsən Mahir Məmmədov Nicat Abasovun bu yarışda maksimum uğurlu çıxış etməsi yolunda əlindən nə gəlirsə, edəcək. Bizə isə şahmatçımıza azarkeşlik etmək qalır. Ümid edək ki, sonda Nicat bizi sevindirəcək".