Tennis həvəskarları indi qarşıdakı böyük turnirin həyəcanı ilə yaşayır.

Dünən Melburnda ilin “Böyük dəbilqə” seriyalı ilk turniri start götürüb. Yanvarın 28-nə qədər davam edəcək “Australian Open”in təşkilatçıları artıq mükafat fondunu da açıqlayıb.

2023 ilə müqayisədə 13 faiz artan mükafat fondu 59,13 milyon dollar təşkil edəcək. İlk dövrədə mübarizə aparan kişi və qadın tennisçilər hərəyə 82020 dollar qazanacaq. 2-ci dövrə üçün 123040, 3-cü dövrə üçün 174300, 4-cü dövrə üçün 256330 dollar nəzərdə tutulub. 1/4 finalda oynayanlar 410130, yarımfinalçılar 676600 dollar alacaq. Fərdi turnirin qalibləri 2 milyon 153 min dollar, finalçılar 1 milyon 179 min dollar “irəli düşəcək”.

Cütlərin yarışında qaliblərə 498900, finalçılara 273420 dollar çatacaq. Qarışıq yarışda (mikst) qaliblər mükafat fondundan 112780, finalçılar isə 64250 dollar götürəcək.