“Arsenal”ın yanvarın 7-də “Liverpul”u qəbul etdiyi və 0:2 uduzduğu kubok oyunu bir başqa məqama görə də əlamətdar olub.

“Topçular” tarixdə ilk dəfə ev oyununda tam ağ formada çıxış edib. Bu, “Adidas”la birgə həyata keçirilən “No More Red” (“Bir daha qırmızı heç nə” – red.) təşəbbüsü çərçivəsində olub.

İş ondadı ki, 2022-ci ilin iyunundan ötən ilin iyununa qədər Londonda soyuq silah tətbiq edilməklə 13500-dən artıq cinayət törədilib. Bu da əvvəlki 12 ayla müqayisədə 21 faiz artıqdı. “No More Red” aksiyası zorakılığa və gənclər arasında soyuq silah tətbiqi ilə cinayətlərə diqqəti cəlb etməyə yönəlib. “Arsenal”la “Adidas” bu kampaniya çərçivəsində Londonda futbol oynamaq üçün daha təhlükəsiz yerlərin yaradılmasına investisiya qoyacaq.

“Arsenal” 2022-ci və 2023-cü illərdə artıq qırmızı rənglərsiz oynayıb. Ancaq klubun 138 illik tarixində ilk dəfə ev oyununda tam ağ rəngli forma dəstindən istifadə olundu.