Sedrik Soareş “Arsenal”ı müvəqqəti tərk edib. Paytaxt klubu təcrübəli futbolçunu icarəyə verib.

Klubun rəsmi saytının məlumatına görə, 31 yaşlı müdafiəçi iş yerini dəyişsə də, Londonda qalıb. O, karyerasını bu şəhərin digər klubunda – “Fulhem”də davam etdirəcək. Sedrikin “bağbanlar”la imzaladığı müqavilənin müddəti mövsümün sonunadək nəzərdə tutulub. Portuqaliyalı oyun praktikası sarıdan korluq çəkirdi. O, bu mövsüm premyer-liqada yalnız 2 matça çıxıb.

“Arsenal”ı Alber Lokonqa da müvəqqəti tərk edib. Belçikalı yarımmüdafiəçi mövsümün sonunadək paytaxtın digər klubuna “Kristal Pelas”a icarəyə verilib. Bu mövsüm premyer-liqada 6 oyun keçirən 23 yaşlı futbolçu “Arsenal”a müqavilə ilə 2026-cı ilin yayına qədər bağlıdı.