Yaxın keçmişin tanınmış futbolcularından olan Ərən Dərdiyok gələcəyi ilə bağlı qərar qəbul edib.

"Football-plus.az" xəbər verir ki, o, 35 yaşında futbolla vidalaşdığını açıqlayıb. Türkəsilli forvardın yeni işinə dərhal aydınlıq gəlib. O, son klubu olan İsveçrənin aşağı liqa təmsilçisi ''Şaffhauzen''in məşqçilər korpusuna daxil olub. Bu kollektivi almaniyalı Kristian Vimmer çalışdırır. Ərən Dərdiyok 1988-ci ildə İsveçrənin Bazel şəhərində doğulub və karyerasına da məhz ''Bazel''də start verib. Daha sonra Almaniyada ''Bayer-04'' və ''Hoffenhaym''ın şərəfini qoruyub. 2015-dən etibarən onun Türkiyə macərası başlayıb. Türkiyəli futbolsevərlər onu daha çox ''Qalatasaray''dakı çıxışı ilə xatırlayır. Dərdiyok 3 il (2016-19) İstanbul nəhəngində çıxış edib. Burda 2 çempionluq olmaqla 3 titul qazanıb və 84 rəsmi oyunda 26 qol, 6 məhsuldar ötürmə ilə fərqlənib. Amma Ərən Türkiyədə ''Qalatasaray''dan başqa ''Kasımpaşa'', ''Göztəpə'' və ''Ankaragücü''də də forma geyib. Ümumilikdə onun Türkiyə karyerasında göstəriciləri belə olub: 164 rəsmi oyun, 55 qol, 15 məhsuldar ötürmə. 2020-21-ci illərdə şərəfini qoruduğu ''Paxtakor''la da çempionluq sevinci yaşayıb. ''Şaffhauzen''ə 2023-ün yayında yollanan Dərdiyok bu mövsüm cəmi 5 rəsmi oyuna çıxa bilmişdi. 2008-18-ci illərdə şərəfini qoruduğu İsveçrə yığmasında isə 60 oyun keçirib və 11 qol vurub.

ƏLİ