Türkiyəli yarımmüdafiəçi Əmrə Çolakla bağlı qəribə hadisələr yaşanır. 31 yaşlı futbolçu dünən qəbul etdiyi qərarla hər kəsi şoka saldı.

Belə ki, o, karyerasını rəsmən bitirdiyini açıqladı. Təcrübəli oyunçu “instaqram” hesabının hekayə bölümündəki paylaşımında bu sözləri yazdı: “Futbolla vidalaşdım. Üzərimdə əməyi olan hər kəsin əlindən öpürəm. Allah sizdən razı olsun. Bu gündən sonra ailəmin xoşbəxtliyi üçün yaşayacam. Ölüm var, sevdiklərinizlə zaman keçirin”.

Bəlkə də Çolak klubsuz qalsaydı, onun qərarını anlayışla qarşılamaq olardı. Amma “Qalatasaray”ın sabiq üzvü ötən ayın sonlarında, daha dəqiq desək, yanvarın 27-də İspaniyanın 3-cü divizionunda çıxış edən “İntersiti” ilə mövsümün sonuna qədər müqavilə imzalamışdı. Ən qəribəsi odu ki, Əmrə Çolak bu qərarından cəmi bir gün öncə yeni klubunda debüt etmişdi. Bazar günü “İntersiti”nin öz meydanında “Atletik”in ikinci komandasını minimal hesabla yendiyi qarşılaşmada Çolak 61-ci dəqiqədə meydana çıxmışdı. Bu üzdən klub rəsmiləri də çaşqınlıq içindədi. Onların sözlərinə görə, Əmrə də matçdan sonra digər futbolçular kimi qələbəni qeyd edib və onun əhval-ruhiyyəsi yerində olub. Yəni onun butslarını mismardan asması üçün heç bir ciddi səbəb görünmürdü. Amma Türkiyə mətbuatının versiyasına görə, Əmrə bu qərarı ölkədə yaşanan dəhşətli zəlzələ üzündən qəbul edib. Hərçənd futbolçu bir neçə saat sonra həmin paylaşımını sildi. Bu üzdən onun karyerasını bitirib-bitirmədiyi hələ də dəqiq bəlli deyil.

Xatırladaq ki, Çolak “Qalatasaray”ın yetirməsidi və 2019-16-cı illərdə bu klubda çıxış edib. İstanbul nəhəngində 180 rəsmi oyunda 19 qol, 19 məhsuldar ötürməlik performans sərgiləyərək 9 titul qazanıb. Əmrə “Cim-Bom”dan sonra iki fərqli dönəmdə “Deportivo”, eləcə də “Əl-Vahda”, “Fatih Karagümrük”, “Hatayspor”, “İstanbul BŞ”nin şərəfini qoruyub. Yenidən İspaniyaya qayıtmamış “Göztəpə”də çıxış etmişdi və ötən ilin noyabrında İzmir klubu ilə qarşılıqlı şəkildə anlaşaraq yollarını ayırmışdı. Türkiyə yığmasında isə 4 oyuna çıxaraq hesabına 1 məhsuldar ötürmə yazıb.