Türkiyəli yarımmüdafiəçi Əmrə Çolakın İspaniya karyerası bu dəfə də uzun çəkmədi.

"Football-plus.az" xəbər verir ki, İspaniyanın 3-cü liqa təmsilçisi ''İntersiti''də forma geyən Çolak rəhbərliklə qarşılıqlı şəkildə anlaşaraq klubla yollarını ayırıb. Bu xəbər klubun rəsmi saytında yerləşdirilib. Ayrılığın dəqiq səbəbi bilinməsə də, Türkiyə mətbuatının iddiasına görə Çolak şəxsi səbəblər üzündən vətəninə qayıtmaq qərarına gəlib.

Xatırladaq ki, 32 yaşlı futbolçu yanvarın ortalarında ''İntersiti'' ilə müqavilə imzalamışdı. Amma müqavilədən qısa müddət sonra Əmrə Türkiyədə baş verən dəhşətli zəlzələnin psixoloji təsiri ilə karyerasını bitirdiyini açıqlamışdı. Düzdü, sonradan onu fikrindən daşındırmaq mümkün olmuşdu. Bu futbolçu ''İntersiti''də ümumilikdə 9 oyuna çıxdı və qol, məhsuldar ötürmə ilə fərqlənə bilmədi. ''Qalatasaray''ın yetirməsi olan və karyerasına bu klubda başlayan Əmrə Çolak daha sonra ''Göztəpə'', ''Fatih Karagümrük'', ''İstanbul BŞ'', ''Hatayspor'', ''Deportivo'' və ''Əl-Vehda''nın şərəfini qoruyub.