Türkiyə çempionatında bu mövsüm istefaların ardı-arası kəsilmir. Növbəti istefa xəbəri “Alanyaspor”dan gəlib.

Bilindiyi kimi, bu komanda son turda “Sivasspor”la ev qarşılaşmasında üzücü məğlubiyyət yaşamışdı. Meydan sahibləri 90-cı dəqiqəyə qədər hesabda öndə olsalar da, Sivas təmsilçisi əlavə vaxtda iki qol vuraraq qələbə qazanmışdı. Bu, Ömər Ərdoğanın “Alanyaspor”un başında keçirdiyi son oyun oldu. 46 yaşlı mütəxəssis oyunsonrası mətbuat konfransında öz istəyi ilə istefa verdiyini açıqladı.

Daha öncə “Fatih Karahümrük”, “Hatayspor” və “Ankaragücü”nü çalışdıran Ərdoğan bu vəzifəyə bu ilin aprelin sonlarında gəlmiş və Ərsun Yanalı əvəzləmişdi. Bu mövsüm 10 oyuna 10 xal toplayan “Alanyaspor” hazırda 14-cü pillədə qərarlaşıb. Antalya təmsilçisi ümumilikdə bu məşqçi ilə keçirdiyi 16 rəsmi oyundan 4 qələbə, 4 heç-heçə, 8 məğlubiyyətlə ayrılmış oldu. Maraqlıdı ki, Ərdoğan 9-cu turdan sonra bu mövsüm məşqçi istefalarının çoxluğunu tənqid etmiş və “məşqçilərlə vidalaşmaq bu qədər asan olmamalıdı. Ayrılanların bir çoxunu yaxından tanıyıram. Bütün günahları məşqçilərin üzərinə atmaq olmaz” açıqlamasını vermişdi. Bununla da cəmi 10 tur arxada qalmasına baxmayaraq, 20 komandalı Türkiyə çempionatında cari mövsüm klubundan ayrılan məşqçilərin sayı 11-ə çatdı!

Bu arada “Alanyaspor”un yeni baş məşqçisi, demək olar, bəllidi. Türkiyə mətbuatının yazdığına inansaq, rəhbərlik sonuncu dəfə Türkiyə yığmasında Ştefan Kuntsun köməkçisi kimi çalışan Kənan Koçakla ilkin razılıq əldə edib. Tərəflər illik 250 min avro məcacib qarşılığında anlaşıblar. Almaniyada doğulan və məşqçi karyerasına da orda start verən 42 yaşlı Koçak daha öncə “Manheym”, “Hannover-96” və “Sandhauzen” kimi klublarda işləyib. Kuntsun istefaya göndərilməsinin ardından Koçak da yığmanın məşqçilər korpusundan öz istəyi ilə ayrılmışdı. Baxmayaraq ki, Türkiyə Futbol Federasiyası onun məşqçilər korpusunda qalmasının və Vinçentso Montella ilə birgə işləməsinin tərəfdarı idi.

Koçak klub futbolunda işləmək istədiyi üçün federasiyanın təklifini geri çevirmişdi.