Vaqif Sadıqovun namizədi Qurban Qurbanovdu? – ÖZÜ AÇIQLADI
Ölkənin futbol yığması noyabrın 22-dən, yəni Canni de Byazi Azəraycanı tərk edəndən bəri baş məqşçisizdi.
Hazırda yeni çalışdırıcının müəyyənləşdirilməsi istiqamətində müəyyən addımlar atılır. İşçi Qrup yaranıb, burda AFFA-nın vitse-prezidenti Elşad Nəsirov sədr, Vaqif Sadıqov, Zaur Axundov, Sərxan Hacıyev, Elxan Səmədov və Fikrət Hüseynov üzvdü. Maraq üçün qeyd edək ki, İşçi Qrupun vəzifəsi dolğun informasiyalar əldə etmək və məsələni AFFA İcraiyyə Komitəsinin iclasına çıxarmaqdı. Bu yöndə ilk iclas dekabrın 15-də, ikincisi srağagün, yəni 26-da keçirilib. Birinci toplantıda hansı mövzuların müzakirə edildiyini diqqətinizə çatdırmışdıq. Vaqif Sadıqov “Futbol+”ə açıqlamasında məqsədlər və vəzifələrin müəyyənləşdirildiyini demişdi. Həmçinin baş məşqçi mövzusuyla bağlı fikir mübadiləsi aparıldığını bildirmişdi.
Bəs 2-ci iclasda hansı məsələlər haqda danışıldı? Proseslər hansı yöndə irəliləyir? Bilindiyi kimi, yeni baş məşqçinin əcnəbi, yoxsa yerli olacağı maraq doğurur. Bu istiqamətdə müzakirələr hansı ehtimalın reallaşacağına ümid verir?
Qeyd etdiyimiz suallarla yenidən Vaqif Sadıqova müraciət etdik. O, bizi yeniliklərlə tanış etdi:
“Bəli, baş məşqçi üçün meyarları müəyyənləşdirmək üzrəyik. Fəaliyyətimiz davam edir. Xeyli vaxtımız olduğundan tələsmək fikrində deyilik. Məsuliyyətli və dəqiq qərar vermək məcburiyyətində olduğumuzun fərqindəyik. Belə hallarda şəxslərin dəqiq təhlil edilməsi çox vacibdi. Amalımız AFFA İcraiyyə Komitəsinin növbəti iclasına qədər həm yerli, həm də əcnəbi namizədləri təqdim etməkdi. Hər iki istiqamətdə səylə çalışırıq. Hələ ki yekun qərar yoxdu. İşçi Qrupun üzvləri sırf əcnəbi və ya yerli məşqçi istədiklərini demir. Əlbəttə, əsas odu ki, həmin adamın futbol biliyi yüksək səviyyədə olsun, özünəməxsus fəlsəfəsini futbolçulara aşılaya bilsin”.
Deməli, yeni çalışdırıcının yerli olmaq ehtimalı da az deyil. Bu məqamda, demək olar ki, hər kəsin ağlına Qurban Qurbanov gəlir. “Qarabağ”ın baş məşqçisi klubdakı uğurlarıyla nəinki Azərbaycanda, Avropada da şöhrət qazanıb. Fürsət düşmüşkən, Vaqif bəydən namizədlərindən birinin Qurban bəy olub-olmayacağını da soruşduq. O, bu haqda açıq danışmağa üstünlük verdi:
“Niyə də yox?! Qurban Qurbanov çox savadlı mütəxəssisdi. Reklama ehtiyacı olmayan adamdı. Baş məşqçinin yerli olmasını istəyiriksə, ona şans vermək mümkündü. Amma başqa mütəxəssislərimiz də var. İnanırıq ki, təcrübəli yerli çalışdırıcılar millimizin inkişafı üçün əlindən gələni edər. Lakin indiki durumda məhz kiminsə adını çəkmək etik olmaz. Qarşıda müəyyən vaxt var. Qərarı mən və ya İşçi Qrup yox, AFFA İcraiyyə Komitəsi verəcək. Ümumiyyətlə, söhbət məhz Qurban Qurbanovdan gedirsə, təbii ki, bunu istərdim”.
Növbəti iclaslarda bəzi mütəxəssislərin iştirak edəcəyini də yazmışdıq. Vaqif Sadıqovdan həmin şəxslərin kimliyinin bəlli olub-olmadığını soruşduq:
“Hələ ki, nə üçüncü iclasın keçiriləcəyi vaxt və format, nə də iclasda iştirak edəcək mütəxəssislərin adı bəllidi. Çalışacağıq ki, yanvarda yenidən bir araya gələk. İstəyirik ki, hər kəs öz fikrini səsləndirsin, dinləyək, fikir mübadiləsi aparaq. İstər müstəqil, istərsə də iş yeri olan şəxslərin düşüncəsiylə tanış olmaq vacibdi. Əsas odu ki, müasir futbolun içindən biri olsun və yeniliklərdən xəbərdar olsun, çətin məqamlardan üzüağ çıxmağın yollarını bilsin və bu meyarları qarşılayacaq çalışdırıcılar haqda fikir sahibi olsun. Biz danışıqları dayandırmırıq”.
Vaqif Sadıqov fikirlərini belə tamamladı:
“Fürsət düşmüşkən, AFFA-nın vitse-prezidenti və Məşqçilər Komitəsinin rəhbəri kimi “Futbol+” ailəsini qarşıdan gələn Dünya azərbaycanlılarının Həmrəyliyi Günü və Yeni il bayramı münasibəti təbrik edirəm. Uğur sizinlə olsun!”
KƏNAN BAHADIR
Digər xəbərlər
