"Hələ ki, əsas məsələlər haqda danışmamışıq. Proses uzun çəkəcək. Çünki, baş məşqçi postuna düzgün şəxsin təyin edilməsi çox vacibdi. Buna görə, səbr və təmkinlə davranmalı, öncə kriteriyaları doğru təyin edib, sonra müəyyən namizədlərin uyğun olub-olmadığını təhlil etməliyik. İclasda İşçi Qrupun görməli olduğu işləri və bunu ən faydalı şəkildə etməyin yolları haqda danışdıq. Hansısa məşqçiylə danışıqların aparılması və ya kiminsə real namizəd olması haqda yayılan məlumatlar həqiqəti əks etdirmir. Bu gün nə kiminsə adı çəkilib, nə də yeni baş məşqçinin yerli və ya əcnəbi olması yönündə konkret qərar qəbul edilib. Ciddi dönəmdən keçirik və hər kəs işinə məsuliyyətli yanaşmalıdı. Dedi-qodulara yox, AFFA-nın rəsmi məlumatlarına istinad etsək, daha peşəkar yanaşma sərgiləmiş olarıq. İclasın onlayn keçirilməsinin səbəbinə gəlincə, bu haqda bilgi sahibi deyiləm. İkincisi də belə olacaq. Əsas odu ki, toplantıların faydalı iş əmsalı yüksək səviyyədə olsun. Qarşıdakı günlərdə bəzi mütəxəssislərin təcrübəsinə də müraciət edəcəyik. Çalışacağıq ki, məqsədəuyğun fikir sahiblərinin düşüncələrindən də yaxşı mənada yararlanaq".