Prezident İlham Əliyev oktyabrın 23-də Sumqayıtda yerləşən Mehdi Hüseynzadə adına stadionda oldu.

Bundan sonra çoxları düşündü ki, artıq şəhərin eyniadlı təmsilçisi bu idman qurğusunda meydana çıxacaq. Lakin gözlər yollarda qaldı. Daha dəqiq desək, Misli premyer-liqasının 14-cü və 16-cı turlarının, uyğun olaraq, “Zirə” və “Qarabağ” ilə oyunlarının yeni arenada keçirilməsi gözlənilirdi. Lakin naməlum səbəblərdən sumqayıtlı azarkeşlərin arzusu reallaşmadı.

Problemin konkret nədən qaynaqlandığını öyrənmək üçün stadionun direktoru Nadir Quliyevlə əlaqə saxladıq. Onun dediyinə görə, Sumqayıt əhlinin gözü uzun müddət yolda qalmayacaq:

Deməli, stadionun inşası zamanı peşəkar səviyyədə oyun keçirmək üçün nəzərdə tutulan standartlara fikir verən olmayıb. Əslində bu ən başda etiraf edilmişdi. Bundan başqa, Sumqayıt şəhər İcra Hakimiyyətinin arenanı kluba icarə haqqı almadan verdiyini də yazmışdıq. Bəlkə də dövlət qurumu məhz bu çatışmazlıqlardan yaxa qurtarmaq istədiyindən belə addım atıb. Bunu redaksiyamıza daxil olan məlumata əsasən iddia edirik. Mötəbər mənbə vasitəsilə əldə etdiyimiz məlumata görə, qurum stadionla bağlı problemlərin mətbuata sızdırılmasını istəmir. Məhz bu üzdən bir neçə dəfə bəzi şəxslərə xəbərdarlıq edilib.

Biz isə oxucu marağını “işlər bu gün-sabah sona çatacaq” sözləriylə qarşılaşmağa məcbur oluruq. Bəs PFL bu haqda nə deyir? Stadionu bir neçə dəfə ziyarət edən qurum rəsmiləri hansı nöqsanlarla üzləşib?

Mətbuat xidmətinin rəhbəri Sənan Abdullayevi dinləyək:

Göründüyü kimi, PFL-in də klubla nəsə qəsdi-qərəzi yoxdu. Nadir Quliyev isə cəmi bir çatışmazlığın olduğunu diqqətimizə çatdırdı. Necə olur ki, Sumqayıt boyda şəhər bir neçə həftə ərzində kiçik problemi aradan qaldırıla bilmir? Halbuki tezliklə hər şeyin səliqə-sahmana salınacağı deyilmişdi. Mövzuyla bağlı sonuncu ünvanımız isə “Sumqayıt”ın mətbuat xidmətinin rəhbəri Zaur Xudiyev oldu. Sizi klub rəsmisinin açıqlamasıyla tanış edirik: “Yenidənqurma işləri tamamlandıqdan sonra PFL-in və “CBC Sport” nümayəndələri bura təşrif buyurub bəzi çatışmazlıqları nəzərimizə çatdırdı. Media sektorunda, çəkiliş platformalarında, paltardəyişmə otağında çatışmazlıqlar, projektorlarda xırda problemlər var idi. Biz bacardıqca bu nöqsanları aradan qaldırmağa çalışsaq da, bizdən asılı olmayan səbəblərə görə bunu bacarmadıq. Bu üzdən 2023-cü ildə stadionun açılışı alınmadı. Sadaladığım nöqsanları yoluna qoyub çempionatın 2-ci yarısında stadionumuzda premyer-liqa matçlarını keçirəcəyik”.

“Futbol+” olaraq, “klubdan asılı olmayan səbəblər” deyildikdə nəyin nəzərdə tutulduğunu öyrənmək istəsək də, Zaur Xudiyev detalları bizimlə paylaşmadı. Hələ ki cavabsız suallar var. İşiniz avand olsun, bəylər. Ümid edirik ki, əfsanəvi partizanın – Mehdi Hüseynzadənin ruhu bundan sonra çox sızlamayacaq!

KƏNAN BAHADIR