Azərbaycan çempionatında çoxlu əcnəbi qapıçı çıxış edib.

Amma onların heç də hamısı yer aldığı komandalarımızda "1 nömrə"yə çevrilə bilməyib. Bu mövsümdən "Zirə"yə transfer olunan Tyaqo Silva seçilənlərdəndi. Portuqaliyalı qəsəbə təmsilçisinə transfer olunandan sonra komandasının əsas qapıçısına çevrilməyi bacarıb. O, davam edən mövsümdə hələlik ən az top buraxan qapıçıdı. Legionerlə "Turan Tovuz"la kubok matçından sonrası söhbətləşdik.

- Bu gün erkən qol buraxdın, amma nə sən, nə də komandan ruhdan düşməyərək irəli atıldı və geridönüş edərək əzmkar qələbə qazandız. Oyunla bağlı fikirlərin maraqlıdı...
- Bəli, çətin oyun oldu. İlk yarıda rəqib yaxşı oynadı, qapımıza qol vurdu. Amma fasilədən sonra meydanda xarakter göstərdik, rəqibi təzyiq altında saxladıq. Hesabı bərabərləşdirdik. Amma bundan sonra da ruhdan düşməyib hücumlarımızı davam etdirdik və daha bir qol vurmaqla qələbə qazandıq. Hesab edirəm ki, bu gün komandamız yaxşı performans sərgilədi. 

- Ölkə kubokuna uğurlu start verdiz. Amma çempionatda üç oyundu qələbəyə həsrətsiz. Səbəb nədi? 
- Doğru deyirsiz, kuboka qələbəylə başlasaq da, premyer-liqada son üç oyunda dalandayıq. Amma bu o anlama gəlmir ki, zəifik və ya komanda kimi meydanda döyüşmürük. Heyətimizdə keyfiyyətli oyunçular var. Hər oyuna da qələbə üçün çıxırıq. Sadəcə, son üç oyunda sanki bəxt də bir qədər rəqiblərimizin tərəfindədi. Çempionatın ilk yarısının son oyununu güclü "Qarabağ"a qarşı keçirəcəyik. Rəqib haqda nəsə deməyə ehtiyac yoxdu. Hamı onun gücünə bələddi. Buna rəğmən, doğma meydanda son çempionu məğlub etməyə çalışacağıq. 

- Azərbaycana gəlişinlə "Zirə"nin "1 nömrə"sinə çevrildin. Belə uğuru gözləyirdinmi? 
- Bir qapıçı kimi "Zirə"yə keçəndən sonra yaxşı çıxışlarım oldu. Bundan çox məmnunam. Amma bu o demək deyil ki, klubumda "1 nömrə"yəm. Komandamızda təcrübəli Anar Nəzirov və potensialı olan gənc qapıçılar var. Hər biri yaxşı həmkardı. Hazırda çempionatda ən az top buraxan qapıçı mənəm. Amma sadaladığım göstəriciləri daha yaxşılaşdırmaq və üzərimdə bir qədər də çalışıb böyük uğurlar qazanmaq istəyirəm. 

- Azərbaycan və Portuqaliya çempionatları arasında fərq nədədi? 
- Azərbaycanda futbolun səviyyəsi yetərincə yaxşıdı. Sadəcə, stadionlarınıza azarkeş axını yoxdu. Portuqaliyada isə nəinki elita, aşağı liqa matçlarında da tribunalar dolur. Düzdü, "Qarabağ"ın avrokubok qarşılaşmalarında  stadionlar dolur. Elə qarşıdan gələn "Braqa" ilə oyunda da stadionun dolacağına şübhəm yoxdu. Təəssüf ki, ölkə çempionatındakı matçlarımıza yetərincə azarkeş gəlmir, demək olar ki, boş tribunalar önündə oynayırıq. Çox istəyərdim ki, Azərbaycanda da futbol matçları zamanı bütün tribunalar dolsun. 

- Sən portuqaliyalısan, Azərbaycanda da yetərincə braziliyalı futbolçu var. Kimlərlə dostluq edirsən? 
- "Zirə"dəki bütün kollektivlə münasibətlərim yaxşıdı. Bundan başqa, "Araz-Naxçıvan"da yer alan "sambaçılar”la münasibətim var. "Turan-Tovuz"da Paçu ilə aramız yaxşıdı.

- Azərbaycanla Portuqaliyanın yaşam tərzində çoxmu fərq var? Sənə ölkəmizdə yaşamaq çətin deyil? 
- Hər iki ölkədə yaşam tərzi aşağı-yuxarı eynidi. Azərbaycanda olmağımdan məmnunam. 

ABDULLA İSMAYILOĞLU