Ponomaryov intriqanın sona qədər davam edəcəyini düşünür - MÜSAHİBƏ
"Şamaxı" - "Sabah" oyununu izləyənlər arasında qonaq komandanın Muşahidə Şurasının üzvü, idman direktoru İqor Ponomaryov da var idi.
"Football-plus.az" olaraq, futbolumuzun canlı əfsanəsiylə komandanın ardıcıl iki oyunda uğursuz çıxışı və başqa məsələlər haqda danışdıq.
- Bu gün gözlənilmədən "Şamaxı"ya məğlub olduz. Oyun haqda fikirləriniz maraqlıdı.
- Bura qələbə üçün gəlmişdik, amma alınmadı. "Şamaxı" döyüşkən xarakter göstərdi. İkinci hissədə bizi iki dəfə əks-hücumda yaxalamaqla məyus etdilər. Bu gün "Şamaxı"nın futbolçularında olan xarakter bizdə yox idi.
- Son iki matçda məğlub olsaz da, oyun planında heç də pis təsir bağışlamırsız. 90 dəqiqə ərzində hücumlar təşkil edirsiz, amma son nöqtəni qoya bilmirsiz. Bunun səbəbi nədi?
- Həqiqətən də çox hücum təşkil edirik. Hətta dominantlıq edərək oyunu rəqibin qapısı önündə keçiririk. İstər "Turan Tovuz", istərsə də "Şamaxı" ilə qarşılaşmada qol buraxandan sonra ruhdan düşməyərək irəli atıldıq. Çox keçmədi ki, hesabı bərabərləşdirdik. Bununla kifayətlənməyərək, yenə də qol vurub qələbə qazanmaq istəyirdik. Amma rəqib bundan istifadə edərək bizi əks-hücumda yaxaladı və zərbə anında top müdafiəçimizin əlinə dəydi ki, nəticədə rəqib penaltidən qələbə qolunu vurdu. Son nöqtəni qoya bilmədiyimiz hallarda rəqiblərimiz bundan maksimum yararlanaraq bizi cəzalandırır. Çalışacağıq bu çatışmazlıq üzərində işləyək.
- Murad Musayev hakimlərin "Sabah"a qarşı qərəzli olduğunu deyir. Həqiqətən belədi?
- Bu suala cavab vermək çox çətindi. Bilmirəm, bəzi hakimlər nə üçün bizə qarşı qərəzlidi. İstənilən halda, biz həmişə ədalətli hakimliyin olmasını arzulamışıq.
- Qarşıdakı oyunlarda komanda toparlana biləcək?
- İddialı komandayıqsa, uğursuzluqdan dərs çıxarmalıyıq. İnanıram ki, qarşıdakı oyunlarda qələbələr qazanmaqla bunu arxada qoyacağıq
- Bazar ertəsi "Qarabağ"la "Neftçi" qarşılaşacaq. Hər iki komanda çempionatda əsas rəqiblərinizdi. Ağdamlılar qələbə qazanacağı təqdirdə xal fərqi 11-ə yüksələcək. "Ağ-qaralar" zəfər qazanacağı halda isə “Sabah”a bir az da yaxınlaşacaq, xal fərqi 2-yə yenəcək. Yəqin həmin matçın heç-heçə başa çatması sizə daha çox sərf edir…
- Əvvəla onu deyim ki, maraqlı qarşılaşma olacaq. Bu matçın nəticəsindən asılı olmayaraq, çempionat marafonunun sonuna hələ xeyli var. Düşünürəm ki, premyer-liqada intriqa son turlara qədər davam edəcək. Təslim olmaq fikrimiz yoxdu, sona qədər mübarizə aparacağıq.
ABDULLA İSMAYILOĞLU
Digər xəbərlər
