"Sumqayıt" gözlənilmədən səfərdə "Səbail"i darmadağın etməklə mövsümə uğurlu başladı. Komandanın qələbəsində pay sahibi olanlardan biri də Səbuhi Abdullazadədi. O, "kimyaçılar"ın 4-cü qolunu vurmaqla oyunda son nöqtəni qoydu.

"Football-plus.az" olaraq Səbuhi ilə həm öz çıxışı, həm də komandasının oyunu ilə bağlı qısa söhbətimiz alındı.

- Bu gün qol vurmaqla komandanın qələbəsində pay sahibi oldun. Fikirlərin maraqlıdı...
- "Səbail" yetərincə çətin və iddialı komandadı. Oyun ağır alındı. Şükürlər olsun ki, uğur bizimlə oldu. Qollar vurduq və evə 3 xalla dönürük. Mövsümə qələbəylə başlamaq sevindiricidi.

- Qol vuracağını gözləyirdinmi?
- Hər bir futbolçu qol vurmaq istəyər. Açığı, rəqib qapısına yol tapacağıma inanırdım. Şükürlər olsun, həmlə edərək qola imza atdım. Amma əsas olan komandamın qələbəsiydi. Şadam ki, qələbə qollarından birini vurdum.

- İlk yarıda sanki oyunun alınmadı. Amma fasilədən sonra daha yaxşı çıxış etdin. Səbəb nə idi?
- Çempionatın ilk turu idi. Heyətimizdə yetərincə çox yeni qoşulan oyunçu var. Nə qədər birlikdə olsaq da, hələ tam uyğunlaşmamışıq. Fasilədən sonra mövsümün ilk oyunu həmişə ağır olur. Ona görə də 1-ci hissədə istədiyim kimi oynaya bilmədim. Amma üzərimdə çalışıb növbəti turlarda daha yaxşı çıxış edəcəyimə inanıram.

- Əmioğlun Rüfət Abdullazadə ilə illərlə "Sumqayıt"da birgə çıxış etmisən. Bu gün isə rəqib kimi qarşılaşdız. Təəssüratın necədi?
- Rüfətlə bir neçə il çiyin-çiyinə "Sumqayıt"da çıxış etmişik. Amma bu artıq keçmişdə qalıb. Əzizim, canım, qardaşım olsa da, onunla artıq rəqibik. Artıq yaşıl meydandan kənarda yaxın, futbol oyunlarında isə qarşı-qarşıyayıq.

- Necə düşünürsən, bugünkü qələbənizin davamı gələcəkmi?
- İnanıram ki, ötən illə müqayisədə bu mövsüm daha yaxşı çıxış edəcəyik. Bunun üçün əlimizdən gələni əsirgəməyəcəyik.

ABDULLA İSMAYILOĞLU