Əliyar Ağayev Xankəndidəki matça niyə təyinat almayıb? - Şok cavabı ÖZÜ VERDİ
Ölkə kubokunun 1/8 finalının Xankəndi şəhər stadionunda keçirilən "Qarabağ" - MOİK oyunu bir çox maraqlı məqamla əlamətdar oldu. Bunlardan biri də hakim təyinatları idi.
Çoxları tarixi oyunun ölkənin ən məşhur hakimi Əliyar Ağayevə və ya bir başqa FİFA referisinə həvalə olunacağını gözləyirdi. Lakin PFL-in matçda bir neçə saat qalmış açıqladığı siyahıda onun adını görmədik. Görəsən, səbəb nə imiş?
Əliyar Ağayev "Football-plus.az”ın sualını belə cavabladı:
"Qarşılaşmanın referisi Əli Əliyev 44 günlük Vətən müharibəsinin fəal iştirakçılarından olub. Dördüncü hakim Kamal Umudlu və yan xətt hakimi Taleh Məmmədov da ikinci Qarabağ müharibəsinin veteranlarıdı. Şirməmməd Məmmədova gəlincə, səhv etmirəmsə, onun yaxın qohum və ya dostu şəhid olub. Mən isə bu müharibələrdə iştirak etməmişəm. Təyinatlar məhz bu amil nəzərə alınaraq verilib".
KƏNAN BAHADIR
