Ölkə kubokunun 1/8 finalının "Kəpəz" - "Sabah" oyununda meydan sahiblərinin start heyətində yer alanlar arasında Tural Rzayev də var idi. Gəncəli futbolçu cari mövsümdə o qədər də şans qazanmır, əsasən ehtiyatdan oyuna qoşulur.

"Bayquşlar"la görüşdə Adil Şükürov "10 nömrə" yə start heyətində şans verdi. Futbolçu ilə həm komandasının, həm də özünün çıxışı ilə bağlı söhbət etdik.

- Gərgin keçən oyunla bağlı fikirlərin maraqlıdı...
- Həm biz, həm də azarkeşlər üçün maraqlı qarşılaşma alındı. Hər iki tərəf qələbəyə yaxın idi, məhsuldar oyun oldu. Amma təəssüf ki, uğur qazana bilmədik. Bu görüşdə start heyətində oynadım. Uzun müddət idi ilk "11-lik"də meydana çıxmırdım.

- Qələbə və ya oyunu əlavə vaxta daşımaq üçün nə çatmadı?
- Biz meydanda bütün gücümüzü qoyduq. Amma rəqibin heyətindəki futbolçuların təcrübəsi, səviyyəsi, əsas da legionerlərin fərdi keyfiyyəti nəticəyə təsir etdi. Bundan başqa, hakimliyə də toxunmaq istərdim. Referi hər xırda epizoda görə fit çalır, bu da tempi aşağı salırdı. İmkan verin futbol oynayaq.

- Artıq çempionatın 1-ci yarısı başa çatmaq üzrədi. Həm öz çıxışın, həm də "Kəpəz"in oyunu haqqında ümumi fikirin necədi?
- Adil müəllimin gəlişindən sonra komandanın oyununda canlanma, inkişaf var. Hər oyunda xarakter göstərir, qollar vururuq. İnanıram ki, qış fasiləsində baş məşqçimiz oyun fəlsəfəsini kollektivə daha yaxşı aşılayacaq. Premyer-liqanın 2-ci yarısında daha yaxşı "Kəpəz" görəcəksiz. Öz oyunuma gəlincə, hələlik o qədər şans qazanmıram. Amma məşqlərdə var gücümlə çalışıram ki, baş məşqçimizin etimadını doğruldum. Adil müəllim nə vaxt şans versə, meydanda bütün bacarığımı ortaya qoyub komandama faydalı olmağa çalışacam.

- 18-ci turda "Neftçi"ylə ağır səfər oyununuz var. Nəyə ümid edirsiz?
- Bu, çempionatın ilk yarısındakı son görüşümüzdü. Bütün rəqiblərə qarşı necə hazırlaşırıqsa, "Neftçi"yə qarşı da elə hazırlaşırıq. Fasiləyə qələbəylə yollanmaq istəyirik. Odu ki, "ağ-qaralar"la matçda bütün gücümüzü ortaya qoyacağıq.

- Bu mövsüm daha çox ehtiyatdan oyuna qoşulursan. Üzərində bir qədər də çalışıb "sarı-göylər"in əsas heyət oyunçusuna çevrilməyi düşünürsənmi?
- Təbii ki, heç bir futbolçu ehtiyatda oturmaq istəmir. Mən də ehtiyatda oturmağıma şad deyiləm. Bu gün əsas amalım "Kəpəz"in əsas heyət üzvünə çevrilməklə komandaya qələbələrinə töhfə verməkdi.

- Qarşınıza elitada qalmaq vəzifəsi qoyulub. Bunun öhdəsindən gələ biləcəksizmi?
- Bir qədər əvvəl qeyd etdiyim kimi, Adil müəllimin gəlişindən sonra komandanın oyununda canlanma var. İndi başlıca məqsədimiz bu canlanmanı bir qədər də inkişaf etdirməkdi. Bütün qüvvəmizlə çalışacağıq ki, elitada qalaq və buna nail olacağıq.

ABDULLA İSMAYILOĞLU