Ölkə kubokunun 1/8 finalının "Kəpəz" - "Sabah" oyununda meydan sahiblərinin start heyətində yer alanlar arasında Nemət Musayev də var idi.

Gənc futbolçu "Baku Sportinq"lə kubok oyununda da start heyətində idi. 21 yaşlı oyunçu ilə komandasının və özünün çıxışıyla bağlı söhbət etdik.

- Nemət, oyunla bağlı reaksiyanı bilmək istərdik...
- Hər iki tərəf mərhələ keçmək üçün mübarizə apardı. Qarşılıqlı qollar vurulan oyun alındı. Ani səhv bizi mərhələdən kənar qoydu. Qapımıza vurulan qolda özümü də günahkar bilirəm. Çünki 90 dəqiqə ərzində Amini zərərsizləşdirmək mənim tapşırığım idi. Artıq kubokla vidalaşmışıq, bütün diqqətimizi çempionata yönəldəcəyik. Bacardığımızın ən yaxşısını edəcəyik ki, elitada qalaq.

- Ardıcıl iki kubok görüşündə start heyətində yer alsan da, çempionatda az şans qazanırsan. Bunun səbəbi nədi?
- Əvvəla baş məşqçimizə mənə güvənib kubok matçlarında şans verdiyi üçün təşəkkür edirəm. Premyer-liqa oyunlarına gəlincə, nə vaxt Adil müəllim lazım bilsə, məni meydana buraxacaq. Qalır məşqdə daha səylə çalışıb, şansımı gözləmək.

- Arxada qalan 17 premyer-liqa və 2 kubok matçına əsasən komandanın oyunu haqda nə deyərdin?
- Komandamızın oyununda irəliləyiş var. Kollektivin əhval-ruhiyyəsi, motivasiyası da yaxşıdı. Bacardığımız qədər hər oyuna maksimum nəticə üçün çıxırıq.

- 2-ci yarı daha gərgin olacaq. Elitada qala biləcəksizmi?
- Bizim üçün hər tur ağır keçir. Ona görə də hər oyuna final matçı kimi çıxırıq. Təbii ki, çempionatın 2-ci yarısı daha ağır olacaq. Amma biz də təslim olmayacağıq. "Kəpəz"in elitada qalması üçün sona qədər döyüşəcəyik.

- Komandada ən çox kimlə dostluq edirsən?
- Ümumi götürəndə bütün kollektivimiz mehribandı. Hər kəslə münasibətim yaxşıdı. Amma bir az Vurğun Hüseynovla daha yaxınam. Ondan çox şey öyrənirəm. Sağ olsun, paltardəyişmə otağından tutmuş meydanda oyunlara kimi mənə böyük qardaş və təcrübəli futbolçu kimi çox dəstək verir.

ABDULLA İSMAYILOĞLU