Misli premyer-liqasında 18-ci tura start verilib.

“Football-plus.az” xəbər verir ki, “Qəbələ” “Sabah”ı məğlub edib - 1:0. Matçdan sonra “qırmızı-qaralar”ın çalışdırıcısı Elmar Baxşıyevin mətbuat konfransı keçirilib. Sizi onun fikirləri ilə tanış edirik:

- Fasilədə nələr etməyi planlaşdırırsınız?
- Planımız Antalyaya getmək idi. Amma düşündük ki, Qəbələdə qalaq. Hazırlığımızı burada keçəcəyik.

- Dünən klub prezidenti Fariz Nəcəfov komandanın məşqində iştirak etdi. Bunun oyununuza təsiri necə oldu?
- Fariz müəllim tək dünən yox, hər həftə komanda ilə görüşür. Bu, media üçün təəccüblü ola bilər, bizim üçün təəccüblü deyil. Biz onu həmişə görürük və hiss edirik.

- Türkiyə səfərindən vaz keçməyiniz turnir cədvəlindəki mövqeyinizlə bağlıdı?
- Xeyr. Mənim tərəfimdən belə təklif oldu ki, Türkiyə səfirinin əvəzinə imkan olduqca yeni oyunçu ilə güclənək.

- "Qəbələ" ilin ilk yarısında çox uğurlu oldu, ikinci yarısında isə komanda çempionatın autsayderidi. Bu fərqin səbəbi nədi?
- Enişləri biz də təxmin edirdik. 10 nəfər komandadan ayrıldı. Ötənilki heyətimiz üç ilə formalaşmışdı. Bütün oyunçular bir-birinə adaptasiya olmuşdu. Bu komanda yenidi. Stabillik çatmır. Komandanın yığılmasından dörd ay keçib. Az müddətdi. Hiss edirik ki, komanda getdikcə daha sanballı oynamağa çalışır. Bəzi mövqeləri gücləndirə bilsək, daha da iddialı ola bilərik.

- Neçə transfer olacaq?
- Burada açıqlamaq istəmirəm. Hər mövqedə rəqabət olmasını istəyirəm. Sevindirici hal odu ki, bu il Nicatı qazandıq. Heç kimin tanımadığı futbolçu idi. Biz oyunçu nəzərimizdə var. Düşünürəm ki, iki futbolçu olsa, daha yaxşı olar.

- Hücumçudu?
- Həm hücum, həm müdafiə xəttinə.

- Heyətdə bəzi dəyişikliklər etmişdiz idi. Bunun səbəbi nə idi?
- Murad Musayev də bizim inandığımız futbolçudu. Bir dönəm onda eniş hiss olunurdu. Ola bilər beynində futboldan kənar şeylər var idi. Hamıya güvənirik.

- Əlinizdə olan oyunçuları itirmək kimi narahatlığınız yoxdu?
- Keçən il həmin sıxıntını yaşadıq. Bir çox futbolçumuzun müqaviləsi iki illikdi. Qışda sözləşməsi bitən oyunçu yoxdu.

- Transfer təklifi alanlar var?
- Hansısa futbolçumuza yaxşı təklif gəlsə, klub səviyyəsində dəyərləndirməyə hazırıq.

- Milli komanda ilə adınız hallanır. Bu haqda nə düşünürsünüz?
- Milli ilə bağlı İşçi Qrupu qərar verəcək. Mənim burda olmağımın səbəbi var. Demək olar bu klubun yetirməsiyəm. Burda inkişaf edib məşqçiliyə başlamışam. Hələ ki, daha çox "Qəbələ"ni bu durumdan çıxarmaq fikrindəyəm. Qarşıda nə olacağını Allah bilir.