"Komanda bacardığı qədər mübarizə apardı"
Misli premyer-liqasında 33-cü tura start verilib.
"Football-plus.az" xəbər verir ki, "Kəpəz" "Sabah"ı qəbul edib - 0:3. Oyundan sonra meydan sahiblərinin çalışdırıcısı Tərlan Əhmədovun mətbuat konfransı keçirilib. Sizi mütəxəssisin fikirləri ilə tanış edirik:
"Sabah"ı təbrik edirəm, layiqli qələbə qazandılar. İlk qolu tez buraxdığımız üçün komandada bir az ritm pozuldu. Ümumilikdə futbolçuların çıxışından narazılığım yoxdu. Komanda bacardığı qədər mübarizə apardı. İkinci hissədə yaratdığımız epizodda top qapı xəttini keçmişdi. Qol qeydə alınsaydı, fərqli oyun görə bilərdik. "Şamaxı" ilə matçda hiss etmişdim ki, komandam yorğunluq fonunda oynayır, buna görə də geri gedir. Amma bu gün futbolçular sağolsunlar ki, məğlub olmağımıza baxmayaraq baxımlı futbol oynadılar. "Sabah"dan çəkinmirdik, rahat hücumlar qururduq, topa nəzarət etməyə çalışırdıq. Bilirdik ki, rəqibin çempionluq şansı var. Buna görə də mübarizə aparacaqlar. Məni məyus edən Gəncədən gələn fanatların buradan üzücü halda qayıtmasıdı. Qarşıdakı matçlarda bizə heç olmasa, 3 xal lazımdı ki, premyer-liqada qalaq".
- Komandanın ev oyunlarını Qəbələdə keçirməyinin nəticələrə təsiri nə qədərdi?
- Həddən çox təsiri var. Gəncədən Qəbələyə gəlib-qayıdırıq. Daha sonra Gəncədən Şamaxıya, Sumqayıta. Şamaxıda demişdim ki, yol yorğunuyuq. Onda artıq həyəcan təbili çalırdım. Yol yorğunluğundan sonra komandanın istirahəti... Yenə deyəcəklər ki, Tərlan Əhmədov şəraitdən gileylənir. Gəncədə evdə oluruq. İki saat yarıma Qəbələyə gəlib, yenə Gəncəyə qayıdacağıq. Bir həftədən sonra Bakı səfəri var, beş saatlıq yoldu. Gəncədəki atmosferi görə bilmirik. Mən nə qədər yoruluramsa, futbolçular on dəfə artıq yorulurlar. Yol yorğunluğu özünü büruzə verir. Bizim heç bir imkanımız yoxdu. Amma çalışacağıq ki, komandanı premyer-liqada saxlayaq. Bunun üçün əlimizdən gələni edəcəyik.
Digər xəbərlər
