Həftəsonu keçirilən 36-cı turun oyunları ilə premyer-liqada mövsüm başa çatdı.

Bütün mükafatçılar bəlli olduğundan hesabat turu bu yay qitəmiqyaslı turnirə yollanacaq sonuncu və elitanı tərk edəcək komandanın adını müəyyənləşdirmək baxımından maraqlı idi. 4-cü pillənin sahibi kim olacaqdı: “Qəbələ”, yoxsa “Zirə”?

Heç şübhəsiz, “qırmızı-qaralar” daha şanslı idi. Bir xal bölgə təmsilçisini Avropaya daşıyacaqdı ki, belə də oldu. “Kəpəz”lə görüş hər nə qədər gərgin ab-havada keçsə də, sonda “Qəbələ” hava-su kimi lazım olan bir xalı hesabına yazdırdı. “Zirə”nin səfərdə “Sumqayıt” üzərində əldə etdiyi böyükhesablı qələbə isə ancaq statistika baxımından “qartallar”ın işinə yaradı.

Turun ən maraqla gözlənilən matçı “ASCO Arena”da baş tutdu. “Səbail” - “Şamaxı” qarşılaşmasında elitanı tərk edəcək komandanın adı müəyyənləşəcəkdi. Bir qol “Səbail”in taleyini həll etdi. “Dənizçilər” çətinliklə olsa da, premyer-liqada qalmağı bacardı. “Şamaxı”ya gəlincə, Cavid Hüseynov – Vüqar Əsgərli tandeminin çalışdırdığı kollektiv mövsümboyu sərgilədiyi oyunla mübarizəyə rəng qatsa da, sonda azarkeşlərini məyus etdi. “Şirlər”in aşağı dəstəyə yuvarlanmasının əsas səbəbi təcrübəsizlik oldu desək, yanılmarıq. Bəlkə də ötən yay klub rəhbərliyi heyətə 2-3 səviyyəli legioner dəvət etsəydi, bu gün “Şamaxı” haqda keçmiş zamanda danışmazdıq. Reallıq odu ki, klub aşağı dəstəyə yuvarlanıb. Buna baxmayaraq, “münəccimlər” çıxışı ilə çempionatda iz qoymağı bacardı.

Turun ikinci oyun günündə “Neftçi” mövsümdə ilk dəfə “Sabah”ı məğlub etdi. Turnir cədvəli baxımından heç bir məna daşımayan matça “tələbələr”in motivasiyasız çıxdığı hiss olunurdu. Ancaq bu məqam belə “ağ-qaralar”ın qələbəsinə kölgə salmamalıdı. Ən azı ölkə kubokunun finalı ərəfəsində “Sabah”la oyun “Neftçi” üçün faydalı idi.

Tarixində 10-cu çempionluğu bayram edən “Qarabağ”ın heç bir turnir hədəfi qalmayan “Turan Tovuz”u yenəcəyi gözlənilən idi ki, ağdamlılar favorit statusunu doğrultdu. Matçda yaddaqalan məqamlardan biri qonaqların heyətində Runi Evanın və “Qarabağ”ın forvardı Musa Qurbanlının adını tabloya yazdırması oldu. Kamerunlu forvard komandasının 36 qolundan 16-nın müəllifi kimi tarixə düşdü. Musa isə bombardirlik yarışında komanda yoldaşı Ramil Şeydayevdən bir top geri qalmaqla mövsümü 22 qolla tamamladı. 2022/23 mövsümünün ən sərrast futbolçusu adına isə Şeydayev yiyələndi. Taylanda yollanacağı dəqiqləşən Ramil ölkəni bombardir kimi tərk etdi.

Misli premyer-liqası
27 may

Sumqayıt – Zirə 0:3
Qəbələ - Kəpəz 1:1
Səbail – Şamaxı 1:0

28 may

Neftçi – Sabah 1:0
Qarabağ – Turan Tovuz 3:1

1. Qarabağ 36 28 6 2 91-25 90
2. Sabah 36 25 6 5 75-24 81
3. Neftçi 36 20 8 8 63-38 68
4. Qəbələ 36 13 11 12 47-47 50
5. Zirə 36 13 11 12 45-46 50
6. Turan Tovuz 36 10 9 17 36-49 39
7. Sumqayıt 36 8 7 21 26-70 31
8. Kəpəz 36 6 13 17 34-62 31
9. Səbail 36 7 8 21 32-62 29
10. Şamaxı 36 4 13 19 26-52 25

Bombardirlər: Ramil Şeydayev (Qarabağ) – 22, Musa Qurbanlı (Qarabağ) – 21, Coy-Lens Mikels (Sabah), Emin Mahmudov (Neftçi) – 17, Aleksey Kaşuk (Sabah), Runi Eva (Turan Tovuz) – 16.

RƏŞAD