D qrupu
İnter - Real Sosyedad 0:0
İnter (Milan, İtaliya): Zommer, Auqusto, Açerbi, Darmian, Kuadrado, Dimarko (Bastoni, 77), Frattezi, Çalhanoğlu (Asllani, 82), Mxitaryan (Barella, 65), Sançes (Lautaro Martines, 65), Türam (Arnautoviç, 65).
Real Sosyedad (San Sebastyan, İspaniya): Remiro, A.Traore, Subeldiya (Elustondo, 77), Le Norman, Munyos (Tirni, 86), Subimendi, Kubo (K.Fernandes, 86), Merino, Zaxaryan (Maqunaselayya, 77), Oyarsabal, Sadik (Turryentes, 61).
Vərəqələr: Subeldiya, 21. Zaxaryan, 44. Kubo, 76. Lautaro Martines, 80. Elustondo, 85 - sarı.
Hakim: Sandro Şerer (İsveçrə).
12 dekabr. Milan. 69010 tamaşaçı.

oyunun statistikası
10 (2) qapıya (“çərçivə”yə) zərbə 5 (2)
1 künc zərbəsi 5
4 ofsayd 0
9 qayda pozuntusu 21
1 (0) sarı (qırmızı) vərəqə 4 (0)
38 topa sahibolma (faizlə) 62

"Football-plus.az" xəbər verir ki, “İnter” və “Real Sosyedad” hələ qrup mərhələsinin 4-cü turundan sonra 1/8 finala vəsiqəni təmin etmişdi. Çempionlar Liqasının son finalçısı üçün qrupda vahid liderliyi ələ almaq üçün gözəl fürsət yaranmışdı. Simone İnzaqinin komandası bunun üçün evdə san sebastyanlılara mütləq qalib gəlməli idi. Heç-heçə halında “Real Sosyedad” 1-ci yerdəki mövqeyini qoruyacaqdı. Bu komandaların İspaniyada sentyabrın 20-də baş tutan oyunu 1:1 hesabı ilə başa çatmışdı. İmanol Alquasilin komandası Milanda bir xal qazanacağı halda topların daha yaxşı fərqinə əsasən qrupu lider kimi başa vuracaqdı.

“İnter”in start heyəti bir qədər qeyri-optimal görünürdü. Belə ki, zədəli olan Pavar, De Vrey və Dyumfrisdən başqa Bastoni, Barella və Lautaro Martines kimi aparıcı oyunçular da ilk “11-lik”də deyildilər. İnzaqi komandasının həftəsonu A seriyasında keçirəcəyi “Latsio” ilə səfər oyununu düşünərək ÇL matçında bəzi vacib oyunçulara az-çox istirahət imkanı vermişdi. Bu isə rəqibin xeyrinə olan qərar kimi dəyərləndirilməli idi. İtaliya və İspaniya təmsilçiləri ÇL-də çərşənbə günü keçirilən matçlar sırasında ən baxımsız oyunu reallaşdırdılar. İlk hissədə yaddaqalan hücum qura bilməyən “İnter” rəqibin güclü pressinqi qarşısında aciz qaldı. İtaliya nəhənginin heyətində ikinci hissənin ortalarında bir sıra vacib oyunçuların peyda olması İnzaqinin artıq qələbəni düşündüyünü göstərirdi. Onun komandası fəallaşsa da, lazımi nəticəyə nail ola bilmədi. Qolsuz “sülh” “Real Sosyedad”ın 1-ci yerdəki mövqeyini rəsmiləşdirdi.

Zaltsburq - Benfika 1:3 (0:2)
Zaltsburq (Avstriya): Şlaqer, Dediç, Pentkovski, Pavloviç, Bedu, Bidstrup (Şimiç, 90+5), Qurna-Duat, Suçiç, Qlux (Kameri, 82), Ratkov (Fernando, 55), Dorjeles (Koyta, 55).
Benfika (Lissabon, Portuqaliya): Trubin, Eursnes, Araujo, Otamendi, Morato, Neveş, Kökçü (Gedeş, 68), Di Mariya, R.Silva (Florentinu, 90+4), Joao Mario (Kabral, 90+1), Tenqstedt (P.Musa, 46).
Qollar: Di Mariya, 32 (0:1). R.Silva, 45+1 (0:2). Suçiç, 57 (1:2). Kabral, 90+2 (1:3).
Vərəqələr: Qurna-Duat, 10. Morato, 45+4. Ratkov, 51. P.Musa, 72. Kameri, 82. Şlaqer, 90 - sarı.
Hakim: Daniel Zibert (Almaniya).
12 dekabr. Zaltsburq. 27134 tamaşaçı.

oyunun statistikası
17 (6) qapıya (“çərçivə”yə) zərbə 18 (6)
2 künc zərbəsi 6
4 ofsayd 2
8 qayda pozuntusu 8
4 (0) sarı (qırmızı) vərəqə 2 (0)
45 topa sahibolma (faizlə) 55

“Zaltsburq” 1-ci turun səfər oyununda çoxlarının gözləmədiyi halda “Benfika”nı 2:0 hesabı ilə məğlub etmişdi. Sonuncu tur ərəfəsində “İnter”lə matçda (3:3) ilk xalını qazanan “Benfika” Zaltsburqda azı iki top fərqi ilə qalib gəlməyə çalışacaqdı. Əks halda ÇL-in ötən mövsümünün 1/4 finalçısı olan Portuqaliya nəhəngi üçün avrokubok macərası dekabrda bitəcəkdi.
“Zaltsburq” ev oyununda hətta bir top fərqi ilə uduzacağı halda belə 3-cü yeri tərk etməyəcəkdi. Avstriya çempionunun planı ilk hissədəcə pozuldu. Di Mariya birbaşa künc zərbəsi ilə hesabı açdı. Minimum tapşırığı yernə yetirən lissabonlular bununla kifayətlənmədilər. Onların növbəti cəhdlərindən biri Rafael Silvanın qolu ilə nəticələndi. Fasilədən sonra Suçiç fərqi minimuma endirməklə komandasının işini bir qədər asanlaşdırdı. Vəziyyətin dəyişməsi qonaqları əzmkarcasına mübarizə aparmağa vadar edirdi. Rocer Şmidtin komandası əziyyətinin bəhrəsini əsas vaxt sona çatandan sonra gördü. Meydana yenicə çıxan Kabralın dabanı ilə vurduğu 3-cü qol “Benfika”ya 3-cü yeri tutaraq mübarizəni Avropa Liqasında davam etdirmək hüququ verdi.

1. Real Sosyedad 6 3 3 0 7-2 12
2. İnter 6 3 3 0 8-5 12
3. Benfika 6 1 1 4 7-11 4
4. Zaltsburq 6 1 1 4 4-8 4

Oyundan sonra
Simone İnzaqi, “İnter”in baş məşqçisi: “Güclü pressinq tətbiq etməklə işimizi çətinləşdirən rəqibə qarşı oynadıq. Bununla belə, oyun ərzində bir neçə dəfə qapıya yol tapa bilərdik. “Real Sosyedad” La Liqada hətta “Barselona” ilə “Real”ın da işini çətinə salmağı bacarır. Belə komandaya qarşı oynamaq çox çətindi. “Real Sosyedad”ın San Sebastyandakı matçda daha yaxşı təsir bağışladığını düşünürəm. Bu gün isə biz daha yaxşı nəticəyə layiq idik. Qrupu məğlubiyyətsiz və 2-ci yerdə başa vurduq. Lider ola bilməsək də, gələcəyə əminliklə baxırıq. 1/8 finala hələ çox vaxt var. Ötən mövsüm də qrupu 2-ci yerdə başa vurmuş və finala qədər irəliləmişdik”.
Rocer Şmidt, “Benfika”nın baş məşqçisi: “Bu həftə hər birimiz, xüsusilə də Kabral üçün xüsusi idi. Bunu anlayırıq. Kabral “Benfika”ya çox böyük istəklə gəlmişdi, amma komandamızda ilk qolunu vurmaqda çətinlik çəkirdi. Vacib qolun belə məqamda vurulması komandamız üçün həyati əhəmiyyəti vardı. Kabral həlledici anda buna nail olmağa əsas namizədimiz idi”.
Anxel Di Mariya, “Benfika”nın yarımmüdafiəçisi: “Qələbəyə layiq idik. Əla oyun sərgilədik. “Farense” ilə əvvəlki matçda qapı istiqamətində 37 zərbə endirsək də, yalnız bir qol vura bilmişdik. Bu qələbəyə özümüz, ailəmiz və azarkeşlərimiz üçün layiq idik. Klubun prezidenti Ruy Koştaya Avropa Liqasının indi mənə lazım olan turnir olduğunu dedim. Bu turnirdə yalnız iki dəfə oynamışam və indi daha bir şansım var. Doğru yoldayıq, hər bir titul vacibdi və hədəflərə çatmağa çalışacağıq”.
Luka Suçiç, “Zaltsburq”un yarımmüdafiəçisi: “Çox məyusuq. Son dəqiqələrdə həlledici qolu buraxmaq fövqəladə dərəcədə üzücüdü. Komandamız çox güclü rəqiblərin olduğu çətin qrupda mübarizə apardı. Belə səviyyədə ən kiçik səhv belə bağışlanmır. Bütün gücümüzü meydanda qoyduq, lakin cüzi nöqsanlara görə sərt cəzalandıq”.