D qrupu
İnter - Benfika 1:0 (0:0)
İnter (Milan, İtaliya): Zommer, Pavar, Bastoni, Açerbi, Dyumfris (Darmian, 73), Barella (Klassen, 90+2), Dimarko (Auqusto, 84), Çalhanoğlu (Asllani, 84), Mxitaryan, Martines, Türam (Sançes, 73).
Benfika (Lissabon, Portuqaliya): Trubin, Bax (Araujo, 22), Otamendi, Morato, Bernat (Kabral, 80), Neveş, Kökçü (P.Musa, 69), Di Mariya (Yurasek, 80), R.Silva (Şikinyo, 68), Eursnes, Neres.
Qol: Türam, 62.
Vərəqələr: Martines, 67. Barella, 68. Dyumfris, 70. Asllani, 90+5 - sarı.
Hakim: Danni Makkeli (Niderland).
3 oktyabr. Milan. 66573 tamaşaçı.

oyunun statistikası
21 (7) qapıya (“çərçivə”yə) zərbə 7 (3)
6 künc zərbəsi 5
3 ofsayd 2
10 qayda pozuntusu 5
4 (0) sarı (qırmızı) vərəqə 0 (0)
46 topa sahibolma (faizlə) 54

"Football-plus.az" xəbər verir ki, “İnter” qrup mərhələsinə “Real Sosyedad” ilə səfər oyununda başlamış, İtaliyaya böyük çətinliklə bir xalla (1:1) qayıtmışdı. İlk turda öz meydanında gözlənilmədən “Zaltsburq”a uduzan (0:2) “Benfika” İtaliya klubu ilə növbəti görüşə qisas hissi ilə çıxacaqdı. Xatırladaq ki, Çempionlar Liqasının son finalçısı ötən mövsüm 1/4 finalda lissabonluları iki oyunun (2:0, 3:3) nəticəsinə əsasən mübarizədən kənarlaşdırmışdı. Amma Rocer Şmidtin komandasının qisası baş tutmadı.

Milanda keçirilən matçı izləməyənlər yalnız hesaba görə meydanda bərabərsəviyyəli mübarizənin yaşandığını düşünə bilərlər. Amma bu düşüncə heç də doğru deyil. Qonaq komanda yalnız ilk hissədə az-çox rəqabət apara bildi. Simone İnzaqinin fasilədə komandasına lazımi təlimatlar verdiyi 2-ci hissədə aşkar göründü. Milanlılar fasilədən sonra rəqib üzərində böyük üstünlüyə malik oldular. Martines 5 dəqiqə ərzində həm tiri, həm də dirəyi nişan aldı. Amma Türam 62-ci dəqiqədə komandasının layiq olduğu qolu vura bildi: fransalı hücumçu Dyumfrisin ötürməsi ilə hesabı açdı. Növbəti yarım saat ərzində də meydanda diqtə edən tərəf olan “İnter” bir neçə dəfə ikinci qolu vura bilərdi. Təkcə Lautaro Martines qapı istiqamətində on zərbə endirdi. Ancaq ya Trubin xilaskar rolunda çıxış etdi, ya da zərbələr dəqiq alınmadı. Nəticədə, belə desək, canını darmadağından qurtaran “Benfika” ikinci məğlubiyyətini alaraq autsayder kimi qaldı. Son finalçı isə “Real Sosyedad”la şərikli liderliyə nail oldu.

Zaltsburq - Real Sosyedad 0:2 (0:2)
Zaltsburq (Avstriya): Şlaqer, Dediç, Sole (Bedu, 46), Pavloviç, Terziç, Qurna-Duat, Bidstrup (Kapaldo, 65), Kyerqor (Amankva, 46), Qlux (Suçiç, 78), Şimiç, Konate (Ratkov, 46).
Real Sosyedad (San Sebastyan, İspaniya): Remiro, A.Traore (Elustondo, 84), Subeldiya, Le Norman (Paçeko, 46), Munyos, Subimendi, Merino, Mendes (Turryentes, 82), Kubo (Şo, 63), Oyarsabal, Barreneçea (K.Fernandes, 64).
Qollar: Oyarsabal, 7 (0:1). Mendes, 27 (0:2).
Vərəqələr: Le Norman, 15. Sole, 41. Mendes, 59. Pavloviç, 76. Bedu, 88 - sarı.
Hakim: Bartoş Frankovski (Polşa).
3 oktyabr. Zaltsburq. 28227 tamaşaçı.
oyunun statistikası
12 (1) qapıya (“çərçivə”yə) zərbə 13 (4)
2 künc zərbəsi 5
2 ofsayd 3
11 qayda pozuntusu 13
3 (0) sarı (qırmızı) vərəqə 2 (0)
47 topa sahibolma (faizlə) 53

“Zaltsburq” Çempionlar Liqasının ən gənc heyətə malik komandası olsa da, “Benfika”nı məğlub etməklə D qrupunda ilk turdan liderliyi ələ almışdı. Gerhard Ştruberin çalışdırdığı komandanın “Real Sosyedad”la ev oyununda daha bir sürprizə gücü çatmadı.

“Red Bull Arena”dakı matçın nəticəsi böyük ölçüdə ilk hissədə müəyyənləşdi. Oyuna fəal başlayan basklar ilk real imkanı dəyərləndirə bildilər. 7-ci dəqiqədə Oyarsabal hesabı açdı. İmanol Alquasilin komandası bundan sonra təşəbbüsü bilərəkdən meydan sahiblərinə verdi və əks-hücumlarda növbəti qolu vurmağa çalışdı. İspaniyalı mütəxəssisin bu taktiki gedişi ilk hissənin ortalarında bəhrə verdi. Mendes məhz əks-hücum zamanı qonaqların üstünlüyünü iki topa çatdırdı. Çətin vəziyyətə düşən avstriyalılar qalan vaxtda oyunda dönüş yaratmaq üçün bacardıqlarını etdilər. Onlar arabir Remironun qoruduğu qapıya doğru təhlükəli həmlələrlə yadda qaldılar, ancaq hücumları məntiqi sonluğa çatdırmaqda çətinlik çəkdilər. Ştruberin komandası 2-ci hissənin əvvəlində penalti vurmaq hüququ qazansa da, polşalı hakim Bartoş Frankovski az sonra Şimiçin Remiroya qarşı kobud oynadığını VAR-ın köməyi ilə görüb qərarını dəyişdi. Beləliklə, “Zaltsburq”u səfərdə məğlub edən “Real Sosyedad” topların daha yaxşı fərqinə görə 1-ci yerə sahib çıxdı. Avstriya çempionu isə liderlikdən 3-cü yerə düşdü.

1. Real Sosyedad 2 1 1 0 3-1 4
2. İnter 2 1 1 0 2-1 4
3. Zaltsburq 2 1 0 1 2-2 3
4. Benfika 2 0 0 2 0-3 0
24 oktyabr: İnter – Zaltsburq, Benfika – Real Sosyedad.

Oyundan sonra
Simone İnzaqi, “İnter”in baş məşqçisi: “İlk hissədə daha yaxşı oynaya biləcəyimiz iki-üç epizod oldu. İkinci yarıda tempi yüksəltdik, daha intensiv oynadıq, futbolçularımız əla təsir bağışladılar. Matçın gedişində “Benfika”ya qalib gələcəyimizlə bağlı hiss məni qətiyyən tərk etmirdi. Təəssüf ki, qol imkanlarından maksimum dərəcədə yararlana bilmədik. Amma oyunçularımızın haqqını verməliyəm”.

Rocer Şmidt, “Benfika”nın baş məşqçisi: “İlk hissə bərabər mübarizə şəraitində keçdi. Yaxşı keçidlərimiz, təhlükəli məqamlarımız oldu, lakin düzgün qərarlar vermədik. Hardasa bəxtimizin gətirdiyini də deməliyəm. Rəqib 2-ci hissədə oyuna tam nəzarət etdi, qapıya kifayət qədər zərbə endirdi. Belə vəziyyətdə müdafiə olunmaq asan deyildi və qapımızdan top buraxdıq. “İnter” qələbəyə layiq idi. Ona görə ki, bizdən yaxşı oyun göstərdi”.

Gerhard Ştruber, “Zaltsburq”un baş məşqçisi: “İlk yarıda işimizi çətinə saldıq və buna görə yalnız özümüzü qınamalıyıq. Oyunumuzda intensivlik çatmırdı. Bir sözlə, ilk hissədə heç də ən yaxşı oyunumuzu sərgiləyə bilmədik. Fasilədən sonra aqressiv oynamağa başladıq, nəhayət, oyuna daxil ola bildik. Amma “Real Sosyedad”ın necə yaxşı oynadığını siz də gördüz”.

Brais Mendes, “Real Sosyedad”ın yarımmüdafiəçisi: “Kubo ilə Oyarsabala təşəkkür etmək istəyirəm. Onlar məni nəzarətdə saxlayan rəqib oyunçuları öz tərəfinə çəkməyi bacardılar. Belə oyundaşlarla birgə oynamaq çox asandı, çünki bir-birimizi əla anlayırıq. Biz həm paltardəyişmə otağında, həm də meydanda vahid kollektivik. Bunu oyunumuza baxmaqla görmək olar. Hər şey çox gözəldi”.