Futzal üzrə yüksək liqada “Record club”la “Baku Fire” arasındakı oyunun baş tutmadığını xəbər vermişdik.

“Bakı alovu”nun oyunun startına 75 dəqiqə qalmışa qədər protokolu “Yarışların idarəetmə” sisteminə göndərməməsini Futzal Federasiyasının mətbuat xidmətinin rəhbəri Mahal Məmmədov həmin iş üzrə məsul şəxsin zəlzələyə görə övladından narahat olduğu üçün məktəbə yollanması ilə əlaqələndirmişdi. Bu hadisə ilə bağlı şənbə günü klubun iclası keçirildi. İclasda hansı qərarın qəbul edilməsi ilə bağlı məlumat almaq üçün rəhbərliklə əlaqə saxlamağa çalışdıq. Komandanın baş məşqçisi Teymur Eyvazovun dediyinə görə, klub yanlışlıqla bağlı AFFA-ya müraciət edib və oyunun yenidən keçiriləcəyinə ümid edir. AFFA-nın müvafiq qurumu, çox güman, bu həftə məsələyə baxaraq qərar verəcək.

MİRKAMAL KAZIMZADƏ