"Əslində mən köhnə iş yerimə qayıtmışam. Hələ klub "Şamaxı" adlanmayanda, yəni "İnter", "Keşlə" olan vaxtlarda burda çalışmışam, uzun illər akademiyaya rəhbərlik etmişəm. Son 6 ildə akademiyada işləmişəm. Sadəcə, ötən mövsüm "Şamaxı" elitanı tərk etdi, klubda akademiya və əvəzedici heyət arada qaldığından sevdiyim işdən uzaq düşdüm. Belədə Əsgər müəllim "İmişli"nin “sükanı arxasına” keçəndən sonra məni də komandasında köməkçi kimi görmək istədi. Bu təklifə sevə-sevə razılıq verdim. Əsgər müəllimlə bölgə təmsilçisini, demək olar, yenidən qurduq. Qısası, "İmişli"də işlərimiz yaxşı gedirdi, heç bir problem yox idi. Sadəcə, "Şamaxı"da Vüqar Əsgərli istefa verdi, əvəzinə Ramiz Məmmədov gəldi. Ramil müəllimlə də gəncliyimizdən tanışıq. Onunla uzun illər çiyin-çiyinə "İnter"də işləmişik. Köməkçisi olmağı təklif etdi, buna çox sevindim. Amma "İmişli" rəhbərliyi ilə danışıb, halallıq almalıydım. Bu olmasaydı, "Şamaxı"ya gedişim alınmayacaqdı. Sağ olsun klub rəhbərliyi, təmkinlə, səbrlə məni dinlədilər və getməyimə mane olmadılar. "İmişli"yə gələcəkdə uğurlar arzulayıram. Hazırda "Şamaxı"dayam. Ramiz müəllimlə əl-ələ verərək bütün bacarığımızı, gücümüzü ortaya qoyacağıq ki, "Şamaxı" çempion olsun və elitada çıxış etsin".