Elmar Baxşıyev: “Qətiyyən ola bilməz”
Son günlər idman mediasında ən çox müzakirə olunan məsələlərdən biri də “Qəbələ” ilə uğurlu mövsüm keçirən, “qırmızı-qaralar”a ölkə kubokunu qazandıran və avrokuboklara daşıyan Elmar Baxşıyevin yeni müqavilə bağlamamasıdı. Futbol camiəsində dolaşan xəbərlərə görə, mütəxəssis daha yaxşı şərtlər irəli sürən klubun təklifini gözdən keçirir.
Söylənilənlər nə dərəcədə həqiqəti əks etdirir? “Football-plus.az”a açıqlama verən Elmar bəyin deyilənlərə reaksiyası belə oldu:
“Bu gün üçün əsas diqqəti futbolçulara ayırmışıq. Komandanı komplektləşdirmək yönnündə çalışmaları davam etdiririk. Hazırda mənim müqavilə müddətini uzadıb-uzatmamağım o qədər də vacib deyil. Əsas komandanı gücləndirmək lazımdı. Bilirsiz ki, bəzi yerli və legioner futbolçular mövsümün sonunda bizdən ayrıldı. Bilməliyik ki, kimlər bizimlə yola davam edəcək. Gedənlərin boşluğunu doldurmaq lazımdı. Komandadan ayrılanlarla yanaşı, digər oyunçulara da təkliflər var. Bu günə kimi yalnız Ülvi İsgəndərov müqaviləsinin müddətini uzadıb. O birilərlə danışıqlar davam edir. Komandanı gücləndirmək istəyiriksə, təbii ki, büdcə artırılmalıdı. Bu məsələ rəhbərlik səviyyəsində həll olunduğundan, mənim nəsə deməyim düzgün olmaz”.
Kuluarlarda gəzən söz-söhbətə görə, Baxşıyevin “Neftçi”nin “sükanı arxasına” keçmək şansı var. Söylənilənlərə inansaq, “ağ-qaralar”ın idman direktoru Zaur Əzizov onu paytaxt təmsilçisində görmək istəyir və bu səbəbdən də 42 yaşlı mütəxəssis “Qəbələ” ilə yeni müqavilə bağlamağa tələsmir. Elmar bəyin buna reaksiyası qısa oldu:
“Qətiyyən ola bilməz. Bu barədə heç bir söhbət olmayıb”.
RƏŞAD
Digər xəbərlər
