Həftəiçi Almaniya kubokunun 1/8 finalında 2-ci bundesliqanın iki iddialı təmsilçisi – “Herta” ilə “”Hamburq” arasındakı oyun çox maraqlı və məhsuldar alındı.

"Football-plus.az" xəbər verir ki, əsas vaxtı 2:2 bitən matçın əlavə vaxtında komandalar hərəyə daha bir qol vurdular və qalib penalti seriyasında müəyyənləşdi. Paytaxt təmsilçisi bütün zərbələri dəqiq yerinə yetirərək növbəti mərhələyə yüksəldi.

“Herta”nın 3-cü penaltisini 27 yaşlı Nader Əl-Cindaui yerinə yetirdi. Məsələ burasındadı ki, bu, 27 yaşlı sağ vingerin nəinki “Herta”da, ümumiyyətlə, peşəkar səviyyədə debüt matçı oldu! Buna qədər “Babelsberq”, “Berliner”, eləcə də “Qroyter” və “Fortuna”nın ikinci komandalarında top qovan Əl-Cindaui ötən il “Herta”nın 2-ci komandasına transfer olundu. Bu kollektiv Almaniyanın 4-cü liqasında çıxış edir. Almaniyada, bilindiyi kimi, səviyyəsinə görə 3-cü liqadan daha aşağı liqalar həvəskar sayılır. Bu mövsümü də “Herta”nın 2-ci komandasında keçirən Əl-Cindaui ötən həftə əsas komandaya dəvət aldı. 2-ci bundesliqa çərçivəsində “Elversberq”lə oyunu (5:1) ehtiyatda keçirən bu futbolçu, nəhayət, “Hamburq” ilə oyunun 80-ci dəqiqəsində meydana çıxdı. İlk cəhddən ona bu cür vacib məqamda penalti vurmaq həvalə edildi və fələsətinəsilli futbolçu ümidləri boşa çıxarmadı. Əl-Cindaui həm də bloqer və influenserdi. Yəni sosial şəbəkələrdə olduqca populyardı. Təkcə bir faktı vurğulayaq ki, onun sosial şəbəkədə təqibçilərinin sayı şərəfini qoruduğu klubun təqibçilərinin sayından qat-qat çoxdu! “İnstaqram”da onu 2,1 milyon insan izləyirsə, “Herta”nın rəsmi səhifəsində cəmi 300 min izləyici var. O, “yutub” (1,75 milyon təqibçi) və “tiktok”da (2,6 milyon) da çox populyardı. Naderin paylaşımları əsasən həyat yoldaşı və qızı ilə olan dəbli geyimlərdəki şəkillərdən, videolardan ibarətdi. Yeri gəlmişkən, həyat yoldaşı Luizanın “instaqram”dakı izləyicilərini sayı Naderdəkindən də çoxdu! Onların “yutub”dakı kanalında ən populyar videoçarx 5,7 milyon baxış toplayıb. Çarxın qısa məcmunu belədi ki, Luiza bütün günü yoldaşı ilə Polşa dilində danışsa da, Nader onun sözlərini anlamır. Təbii ki, onların səhifələrində müasir rəqslərə də rast gəlmək olar. Əl-Cindaui ilə əməkdaşlıq müqaviləsi imzalamaq uğrunda “Nayk” və “Adidas” kimi ünlü şirkətlər mübarizə aparırdı. Sonda bu mübarizədən amerikalılar qalib ayrıldı. “Hamburq” üzərində qələbədən sonra Nader jurnalistin “siz futbolçusuz, yoxsa influenser” sualına “mən “Herta”nın bir hissəsiyəm”, - deyə cavab verdi.