Türkiyə futbolunun tanınmış simalarından olan, “Beşiktaş”, “Trabzonspor”, “Fənərbaxça”da top qovmuş, qısa müddət ölkəmizdə “Xəzər Lənkəran”ın da şərəfini qorumuş Oktay Dərəlioğlunun başına şok olay gəlib.

Hadisə dekabrın 5-i, yerli vaxtla saat 16.30 radələrində Kadıköydə baş verib. 48 yaşlı Oktay həyat yoldaşı Başak Dərəlioğlu ilə birlikdə maşınla hərəkət edərkən yol vermək üstündə yaranan kiçik narazılıqdan sonra onların qarşısını başqa bir maşın kəsib. Həmin maşından düşən şəxslər sabiq futbolçunu maşından düşürərək döyməyə başlayıblar! Nə baş verdiyini anlamayan cütlük gözü dönmüş həmin şəxsləri sakitləşdirməyə çalışsalar da, bunun xeyri olmayıb. Aldığı zərbələrdən Oktay Dərəlioğlu yerə yıxılıb. Hücum edən şəxslər onun həyat yoldaşına da xəsarət yetiriblər. Başak Dərəlioğlu çığır-bağır salmaqla ətrafdakı vətəndaşlardan yardım istəyib. Vətəndaşların da müdaxiləsindən sonra adı Zəkai K. və Nurəddin K. olduğu müəyyən edilən şəxslər hüquq-mühafizə orqanları tərəfindən saxlanılıb. Oktay Dərəlioğlu hadisə yerinə gələn “ambulans”la xəstəxanaya yerləşdirilib. İlkin müdaxilədən sonra onun ciddi xəsarət aldığı və qolunun çıxdığı məlum olub. O, dünən əməliyyat olunub. Həyat yoldaşı isə aldığı xəsarətlərlə bağlı həkimdən arayış alıb və polis bölməsində hadisə ilə bağlı ifadə verib. Türk dilində “trafik maqandası” ifadəsi mövcuddu. Bizim dilimizə tərcümədə bu, belə desək, yol lotuları, kobud və ətrafdakılara hörmət etməyən şəxslər kimi tərcümə olunur. Oktaya hücum edənlərin də məhz bu cür şəxslər olduğu güman edilir. Heç bir səbəb olmadan döyüldüyünü bildirən Dərəlioğlu həmin şəxslərin cəzalanmasını tələb edir.