Oktay Dərəlioğlu çatana çatdı, çatmayana daş atdı...
Türkiyə futbolunun tanınmış simalarından olan, bir il “Xəzər Lənkəran”da top qovduğu üçün azərbaycanlı futbolsevərlərin də yaxşı tanıdığı Oktay Dərəlioğlu “Sabah” nəşrinə gündəmə düşəcək açıqlamalar verib.
Football-plus.az xəbər verir ki, 2017-ci ildən məşqçi kimi fəaliyyət göstərən və əsasən Türkiyənin aşağı liqa klublarında işləyən 47 yaşlı Dərəlioğlu hazırda Şimali Makedoniyanın 2-ci liqa təmsilçisi “Qostivari”ni çalışdırır. Bu klub hazırda 15 turdan sonra 11 qələbə, 4 heç-heçə ilə məğlubiyyətsiz liderliyini davam etdirir və elitaya yüksəlməyə əsas namizəd sayılır. Bir çox isimlə bağlı sərt açıqlamalar verən və tənqidi fikirlər səsləndirən Dərəlioğlu bunları deyib:
“Türkiyə xaricdən çox pullu ölkə kimi görünür. Əcnəbilərin böyük əksəriyyəti ölkəmizə yalnız pul qazanmaq üçün gəlir. Çünki onlara burda qazandıqları pulu Almaniya, İspaniya, İngiltərədə verən yoxdu! Hamı Jorje Jezuşa tərif yağdırır. Amma o, bu cür heyət və büdcə ilə komandanı ÇL-in qrup mərhələsinə daşıya bilmədisə, mənim gözümdə uğursuzdu. Az qala 40 oyunçu transfer edilib. Hətta yeni alınan oyunçulardan bəziləri avrokuboklarda iştirak ərizəsinə salınmadı. Heç bu məsələni qabardan yoxdu. Jezuş çox təcrübəli və “qurd” məşqçidi. Bu imkanları və ab-havanı İsmayıl Kartal üçün yaratdılarmı? Jezuşun qazandığı pulun qarşılığı bu nəticələr olmamalıdı. Onun yerində olsam, bu qədər yeni futbolçu aldırmazdım. Bir komanda ardıcıl 8-10 oyuna fərqli heyətlə necə çıxa bilər? Hər futbolçu oynamaq istəyir. Sadəcə, oyunçular pullarını vaxtında aldıqları üçün dillənmirlər. Ya da onları içəridən susdururlar. Bu cür dəyişkən heyət və bu qədər rotasiya mənim məşqçilik anlayışıma ziddi. Belə klublarda həmişə maliyyə sıxıntısı olur. Düzdü, komandanın arxasında Əli Koç dayanıb. Amma 6,5 milyard lirəlik borcun axırı nə olacaq? Məşqçinin hansı ölkədən olması önəmli deyil. Məşqçilər iki yerə bölünür: uğurlu və uğursuz. Ştefan Kunts Türkiyə yığmasını DÇ-yə daşıya bilmədi. Üstəlik Lüksemburqu yenə bilmədik və Farer adalarına uduzduq. Məncə, bu oyunlardan sona Kunts dərhal istefa verməliydi. Əmrə Belözoğlu ilə Nuri Şahinin karyeralarını bitirən kimi lisenziyaları olmadan məşqçiliyə başlamaları hörmətsizlikdi. Bu, onlar üçün də yaxşı bir durum deyil. Çünki məşqçi və futbolçu olmaq tam fərqli şeylərdi. Futbolçu olmaq qat-qat asandı. Pro lisenziyası olmayan məşqçi meydanın kənarında dayanıb komandanı idarə edirsə, onun həmin diploma hörməti yoxdu! Rıdvan Yılmaz ilə Əmirhan İlkhan sanki başlarını götürüb qaçdılar. Sırf xaricə yollanmaq üçün bunu etmək düzgün deyil. Rıdvan “Beşiktaş”dan “Reyncers”ə yollandı. Halbuki “Reyncers” “Beşiktaş”dan böyük klub deyil. Sadəcə, “Beşiktaş”ın bu mövsüm Avropada olmaması onları belə addım atmağa vadar etdi. Amma “Beşiktaş”dan gedirsənsə, “Reyncers”ə, “Torino”ya yox, daha güclü klublara getməlisən. Hamı “Fənərbaxça”lı Arda Gülərin hələ 17 yaşda olmasını qabardır. Futbolda yaş rol oynamır. Sənin nə dərəcədə faydalı olub-olmamağın rol oynayır. Mən yüksək səviyyədə 16 yaşımda oynamağa başladım. Əmrə Belözoğlu da 16 yaşında başladı. Mənim üçün 16 yaşlı ilə 36 yaşlı arasında fərq yoxdu. “Fənərbaxça” Elif Elması kəşf edib ortaya çıxardı və yaxşı qiymətə “Napoli”yə satdı. Şimali Makedoniyada Elmas kimi çox oyunçu var. Buranın torpaqları istedad baxımından zəngindi. Amma sistem zəifdi. Klubların şəraiti, bazası yaxşı deyil. İndiyə qədər mənə Türkiyədən heç kim zəng vurmayıb ki, onlara hansısa makedoniyalı futbolçunu məsləhət görüm”.
Digər xəbərlər
